دەزگەهێ خێرخوازی یێ بارزانی كارەبا تێهنا رۆژێ بۆ قوتابخانەیێن دهۆكێ دابین دكەت
زنار تۆڤی:
وەزیرێ پەروەردێ یێ حكومەتا هەرێما كوردستانێ دیار كر، ب هەڤكارییا دەزگەهێ خێرخوازییێ بارزانی سیستەمێ تێهنا رۆژێ بۆ 25 قوتابخانەیێن دیتر ل هەرێما كوردستانێ هاتە دابینكرن و ب ڤێ چەندێ سەرجەمێ ئەوان قوتابخانەیێن ل هەرێما كوردستانێ سیستەمێ تێهنا رۆژێ ب كار دئینن دگەهیتە 120 قوتابخانەیان.
ئالان حەمە سەعید، وەزیرێ پەروەردەیێ یێ حكومەتا هەرێما كوردستانێ دوهی 28/7/2025 د كۆنفرانسەكێ ڕۆژنامەڤانی دا ل پارێزگەها دهۆكێ دیار كر، پار دەزگەهێ خێرخوازییێ بارزانی، كارەبا 10 قوتابخانەیان كرییە تێهنا رۆژێ، سەرجەمێ ئەوان قوتابخانەیێن دەزگەهێ خێرخوازییێ بارزانی دێ كەتە تێهنا رۆژێ دێ بنە 35 قوتابخانە، هەتا نوكە 95 قوتابخانە ل هەرێما كوردستانێ ل سەر بودجەیا حكومەتا هەرێما كوردستانێ و ڕێكخراوێن نێڤدەولەتی كرینە تێهنا رۆژێ ل پارێزگەهـ و ئیدارێن سەربخۆ.
وەزیرێ پەروەردێ گۆت: «ئەو 25 قوتابخانەیێن دوهی دەزگەهێ خێرخوازییێ بارزانی ل پارێزگەها دهۆكێ و هەلەبجە و هەولێرێ كارەبا وان كریە تێهنا رۆژێ، سەرجەمێ قوتابخانەیێن ل هەرێما كوردستانێ سیستەمێ تێهنا رۆژێ ب كار دئینن دێ بنە 120 قوتابخانە».
ناڤهاتی گۆتژی: «كەرتێ پەروەردێ ل پارێزگەها دهۆكێ د گەشەكرنێ دایە و كاریگەری ل سەر كەرتێن دیتر ژی كرییە، وەكو كەرتێ پاقژكرنا ژینگەهێ، ب ڤێ چەندێ دهۆك بوویە باژێرەكێ پاقژ، هیڤیدارین كارێن دەزگەهێ خێرخوازییێ بارزانی ژینگەهەكا باشتر و گونجایتر د ناڤا ناڤەندێن خواندنێ دا بۆ قوتابییان دابین بكەت».
