دەزگەهێ روانگە ب هەڤكاریا زانكۆیا دهۆكێ رۆژا جیهانی یا زمانێ دایكێ ساخكر
ب ئامادەبوونا د. عەلی تەتەر، پارێزگارێ دهۆكێ و نوونەرێ سەرۆكێ حكومەتا هەرێما كوردستانێ و د. نەوزاد عەبدوللا، بەرپرسێ لقێ ئێك یێ پارتی و نوونەرێ سەرۆك بارزانی و نوونەرێ سەرۆكێ هەرێما كوردستانێ و چەندین بەرپرسێن حزبی و ئیداری و رەوشەنبیر و زمانزانان دوهی 23/2/2025 دەزگەهێ روانگە ب هەڤكاریا زانكۆیا دهۆكێ رۆژا جیهانی یا زمانێ دایكێ ل هولا كۆنفرانسان ل ژێر درووشمێ (پێ بئاخڤە – پێ بنڤیسە – زیندی بهێلە) ساخكر.
د بەرنامێن چالاكیێ دا چەند ستران و سرود هاتنە پێشكێشكرن، پاشی د. داود ئەترووشی، سەرۆكێ زانكۆیا دهۆكێ و حكمەت محەمەد نوری، سەرۆكێ دەزگەهێ روانگە ل دهۆكێ پەیڤێن خۆ پێشكێشكرن و گرنگیا پاراستن و پێشئێخستنا زمانێ دایكێ (زمانێ كوردی) بەرچاڤكر.
هەر ب ڤێ هەلكەفتێ مامۆستا بەختیار سوجادی كورتیەك ل سەر گرنگیا زمانێ دایكێ و چاوانیا پێشئێخستنا وی دیاركر.
پاشی پەنەلەكێ زانستی ل دۆر زمانێ كوردی و ئاستەنگێن دهێنە پێش ل هەر چار پارچێن كوردستانێ ژ لایێ پەنەلیستان ( د. هودا عەبدولقادر، د. كەژال محەمەد، د. عزەدین حسێن و د. یەعقوب باكووری) هاتە پێشكێشكرن.
ل دووماهیێ سترانەك ب زاراڤێ هەورەمانی هاتە پێشكێشكرن و پێشانگەها كارسازی هاتە ڤەكرن.
