دەزگەهێ روانگە پڕۆژەیەكێ نـوو دێ ئەنجام دەت
مەحمود نهێلی:
ژ بۆ پتر دیتنا دەلیڤەیێن كاری بۆ گەنجان و بەرچاڤكرنا شیانێن وان، دەزگەهێ روانگە دێ پڕۆژیەكێ نوو ئەنجام دەت و هەژمارەكا زۆرا گەنجان دێ مفای ژێ وەرگرن.
ئەفرام عەبدولئەحەد ئەفرام، رێڤەبەرێ ئوفیسا دهۆك یا دەزگەهێ روانگە بۆ رۆژناما ئەڤرۆ دیار كر، ئەڤە پڕۆژەیەكە د چارچوڤێ پرۆگرامەكێ مەزنتر، كو ب پشتەڤانیا رێكخراوا (J I Z) یا ئەلمانی دێ هێتە ئەنجامدان و گۆت: «ئەڤ پڕۆژە ژ چەندین تەوەران پێك دهێت، ئێك ژ وانا بهێزكرنا شیانێن گەنجایە ب رێكا راهێنانێن پیشەیی و تەوەرێن دی ژی پەیداكرنا پشتەڤانیا ماددییە بۆ كەسانێن خودان هزر، ئەڤێن دڤێن كارێ خوە دەستپێ بكەن یان ژی پڕۆژێ خوە پێش بێخن و تەوەرێ سێیێ ژی بابەتەكێ ژینگەهێ یە، كو ل پارێزگەها هەولێرێ دێ هێتە ئەنجامدان».
ناڤهاتی دیار ژی كر، بابەتێ راهێنانێن پیشەیی ل سەنتەرێ ناوچەداریا دێرەلۆكێ دێ هێتە ئەنجامدان و گۆت: «خۆل و راهێنانێن پیشەیی بۆ هەژمارەكا ئافرەتان دێ هێنە ڤەكرن، ب تایبەت د وارێ دروارێ دا و پشتی ب دووماهی هاتنا خول و راهێنانان، پشتەڤانیا ماددی دێ بۆ هێتە كرن بۆ وێ یەكێ ئەو ئافرەتە كارێ خوە بكەن».
ئەفرام گۆتژی: «پشتی ئەڤ قۆناغە ب دووماهی دهێت، دێ پڕۆژەیەكێ دی دەستپێكەین و هزرێن ڤان گەنجێن دەڤەرێ دێ كۆم كەین و ب رێكا لینكەكی دێ هزرێن وان هێنە هەلسەنگاندن و پاشی دێ پشتەڤانیا ماددی بۆ پەیدا كەین، بۆ وێ یەكێ هزرێن خوە بكەنە پڕۆژە و پێش بێخن و بزنزێ پێ بكەن».
