دەزگەهێ وزەیا ئەمریكی: هنارتنا پەترۆلا ئیراقێ بۆ ئەمریكا ب رێژەیا 50% كێم بوویە
دەزگەهێ وزەیا ئەمریكا راگەهاند، هنارتنا پەترۆلا ئیراقێ بۆ ئەمریكا كێم بوویە، ئەڤە ژی هەڤدەمە ل گەل نەمانا رێڕەوێ كەشتیێن بارهەلگرێن پەترۆلێ ل ئاڤتەنگا هورمز.
دەزگەهێ وزەیا ئەمریكا ئاشكەرا كر، «تێكڕایا هاوردەكرنا پەترۆلا خاڤ یا ئەمریكا د دەمێ حەفتییا بۆری دا وەلاتێن مەزن گەهشتییە پێنج ملیۆن و 840 ملیۆن بەرمیلان د رۆژەكێ دا، كو هەڤبەر ب حەفتییا پێشتر 49 هزار بەرمیل كێم بووینە.»
ئاماژە ب وێ چەندێ ژی كر، «هنارتنا پەترۆلا ئیراقێ بۆ ئەمریكا گەهشتییە 140 هزار بەرمیلان د رۆژەكێ دا، كو هەڤبەر ب حەفتییا پێشتر 130 هزار بەرمیلێن رۆژانە كێم بووینە، چونكی د حەفتییا پێشتر دا تێكڕایا هنارتنا رۆژانە 270 هزار بەرمیل بوون بۆ ئەمریكا.»
هەروەسا دەزگەهێ وزەیا ئەمریكی ئاماژە ب وێ چەندێ دا، كەنەدا رۆژانە سێ ملیۆن و 801 هزار بەرمیل هنارتینە ئەمریكا، سعوودیە 629 هزار بەرمیل، پاشی كولۆمبیا ب 418 هزار و مەكسیك ب 398 هزار بەرمیلان د رۆژەكێ دا، د پێشەنگییا هناردەكاران دانە بۆ ئەمریكا».
ل دووف خشتەی، هاوردەكرنا پەترۆلێ ژ ڤەنزوێلا 194 هزار بەرمیل بووینە د رۆژەكێ دا، ژ ئیكوادۆر 103 هزار، ژ نەیجیریا 84 هزار، ژ بەڕازیل 73 هزار و ژ لیبیا دو هزار بەرمیل بووینە د رۆژەكێ دا.
ئەمریكا پترییا پەترۆلا خاڤ یا خۆ ژ ڤان 10 وەلاتان هاوردە دكەت و بكارئینانا رۆژانە ب نێزیكی 20 ملیۆن بەرمیلان دهێتە خەملاندن، ب ڤێ چەندێ ژی دبیتە مەزنترین بكارئینەرێ پەترۆلێ ل جیهانێ.
