دەستان ژ هونەری بەردەین
دلڤین رەشید:
سترانبێژ (خێری حەجی) د دیدارەكێ دا بۆ رۆژنامە ئەڤرۆ دیاركر كو ئەو خەلكێ دەڤەرا شنگالە و نوكە ئاوارەیە ل سنۆرێ پارێزگەها دهۆكێ و دژیێ (19) سالیێ دا ئامیرێ تەمبۆرێ ژەنیە، د دووڤدا ستران ژی گۆتینە و ب گۆتنا وی ئەو ب تەمبۆرا خۆڤە دچیتە ئاهەنگ و شەهیانان و گەلەك گرنگیێ ب گۆتنا سترانێن فولكلۆری ددەت.
ناڤهاتی گۆت: سترانێن دەڤەرا شنگالێ تایبەتمەندیا خۆ هەیە و نوكە دا ئەم دشێین وەك مێژوو تەماشە بكەینێ، چنكو سترابێژێن مە یێن فولكلۆری رۆلەكی مەزن هەبووینە دپاراستنا هونەرێ دەڤەرێ دا، لەورا گەلەكا گرنگە ئەم وەك نڤشێ نوو ژی بەردەوامیێ بڤێ چەندێ بدەین و فولكلۆرێ خۆ ب پارێزن، بۆ زانین ئاوەرە بوون نەبوو رێگر ئەم دەستان ژ هونەری بەردەین، بەلكو عەشق و ڤیانا مە پتر لێ هات كو ئەم بشێین ب هێز و ئیرادەكا مەزنتر بچینە د هەمبێزا مۆزیك و سترانێن دەڤەرا شنگالێ دا و بڤێ رێكێ خزمەتا هونەر و فولكلۆر و خەلكێ خۆ بكەین.
