دەستهەلاتا خێزانێ د جودابوونێ دایە
سالار محەمەد دۆسكی:
گوهورینێن جڤاكی كارتێكرن ل خێزانێ كریە و ئێدی خێزان بزاڤێ دكەت سەربەخو بژیت، ژبەركو نوكە دەمێ خێزان دهێتە پێكئینان كچ و كۆڕ بەری هەر تشتەكی هزر ل جودابوونێ دكەن، ئەڤە وێ چەندێ دگەهینیت كو ئێدی جڤاك یێ بەر ب پێشڤەچۆنێ دچیت.
شێخ حەبیب بەرواری، مامۆستایە ل قوتابخانا پیرس، لدۆر بابەتی بۆ رۆژنامەیا ئەڤرۆ دیار كر كو قوناغێن ئاڤاكرنا خێزانێ گەلەك دەم دەرباز كرینە و ئەڤە ژی بۆ گۆهورینا جڤاكی ڤەدگەریت و گۆت: (ژبەركو بەری سەرهلدانێ گوند د ئاڤا كری بوون و سەرۆكێ خێزانێ كونترۆل ل سەر هەموو ئەندامێن خێزانێ هەبوو، د هەمان دەمدا دناڤ خێزانێ دا ژی، كابانیا مالێ كونترۆل ل سەر هەبوو، چ پێنگاڤ نە دهاتنە هاڤێتن ڤیابا ب بریارا وێ با).
ماموستا حەبیب گۆتژی: (ئەڤێ چەندێ ژی دیار دكر كو خێزانێ ناڤ و هەیبەت و سەنگا خۆ دناڤا گوندی دا هەبوو، و ئەڤە هەموو ژی بۆ مەزنێ خێزانێ و هەڤژینا وی ڤەدگەریا و پشتی سەرهلدانێ دەما خەلكێ كوردستانێ بەر ب باژێرا هاتی ئەڤ چەندە بەر ب كێمبوونێ چوو، ئێدی سەرۆك خێزانێ كونترۆل نەما، دەمێ خێزان دهاتە پێكئینان بەری هەر تشتەكی هزر ل جودابوونێ دهاتە كرن، چونكە ل دەف ژنێ ئارامی و خوشیا وێ ژ هەر تشتەكی گرنكترە و گۆت: (ب دیتنا من خێزان هێشتا بچووكتر یا لێ دهێت و ئێدی وەك وەلاتێن بیانی گەنجێ مە ژی یێ هزر ل جوودابوونێ دكەت و دبینیت هزر و بیرێن وی بتنێ دێ پتر گەشێ كەن).
رێڤەبەرێ قوتابخانا پیرس ماموستا ئیبراهیم شەعبان، لدور هەمان بابەت دیار كر، هەر جڤاكەكێ جیهانێ ل سەر هندەك دابونەریتا خێزان ئاڤا كریە و گۆت: (جڤاكێ كوردەواری ژی وەك هەر جڤاكەكی هندەك دابونەریتێن كوردەواری و ئاینی هەنە كو ئەم پێ هاتینە نیاسین و پەروەردەكرن، و خێزانا كوردی گەلەك دابونەریتێن جوان هەبووینە كو خێزان ب ئەوان دابونەریتان یا ئێكگرتی بوو).
ماموستا ئیبراهیم دیار كر ژی، قوناغ بۆ قوناغێ ژیان هاتە گوهورین و ئێدی تێكەلی دروست بوو دناڤبەرا خەلكێ گوندان و باژێران و گەلەك هاتنە باژێران و دووڤدا پەیوەندی دناڤبەرا جڤاكێ مە و جڤاكێن بیانی دا دروست بوون و هزر و نەریتێن ئەوان جڤاكان هاتنە دناڤا جڤاكێ و كوردی دا و ئێدی كونترولا سەرۆك خێزانی ل سەر خێزانێ كێم بو، خێزان پتر بەلاڤ و بچوویك دبیت).
مامۆستا نیهایەت ئسماعیل، ل قوتابخانا كوردایەتی، نێرینەكا نێزیكی هەردو مامۆستایان هەبوو دیار كر كو گوهورینێن جڤاكی و هاتنا وەلاتیان ژ گوندان بۆ باژێران وەكر كو نێزیكبوونا خێزانا ل گەل ئێكودو و پتر بیت و هزر و بیر و باوەر هاتینە گوهورین و ئەڤێ چەندێ كارتێكرن ل خێزانێ كریە و زێدەتر خێزانێ بزاڤ كرینە سەربەخو بژیت و كار ب هزر و بیرو باوەرێن خوە بكەت و گۆت: (دیسا زێدەتر دەستهەلات بۆ خێزانێ ڤەدگەریت و ئەڤە وێ چەندێ دگەهینیت زێدەتر خێزان و بتایبەت ئەوێن ژنوی خێزانێ پێك دئینن بەر ب پێشڤەچوونێ بچن).
