دەستهەلاتا دادوەریێ ل ئیراقێ ژ ئەركێ خوە یێ راستەقینە لادایە
ئەندامەكێ كۆنگرێسێ ئەمریكی راگەهاند: ئەركێ دادوەری چەسپاندنا قانوونێیە نەك دەستخوەشیكرن ل وان یێن چەندین سالە ژ دەرڤەی قانوونێ كار دكەن.
جۆ وێلسۆن، ئەندامێ كۆنگرێسێ ئەمریكا د پۆستەكیدا ل تۆرا جڤاكییا ئێكس نڤیسی» ئەو سوپاسییا سەرۆكێ جڤاتا بلند یا دادوەریێ ل ئیراقێ ئاراستەی گرۆپێن چەكدار كری ل بەرامبەر بزاڤا دانانا چەكێن خوە، تنێ دەربڕینەكا سادە نینە، بەلكو دەربڕینەكا مەترسیدارە ژ تێكچوونا بێلایەنییا گرنگترین دەزگەهێن دەولەتێ. ئەڤ زمانە زمانێ دەزگەهەكێ دەستووری نینە كو ئەركێ وی پاراستنا قانوونێ بیت، بەلكو رەنگڤەدانا هەڤبەندییا نهێنێ و بەردەوامە د ناڤبەرا سەركردایەتییا دادوەریێ و گرۆپێن میلیشیییان».
هەروەسا گوت» د بنەمایێن دەولەتسازیێدا، دەستهەلاتا دادوەرییا سەربخوە نەك هەر سوپاسییا گرۆپێن چەكدار ناكەت، بەلكو هەلسەنگاند ژی بۆ كریارێن وان یێن سیاسی و سەربازی ناكەت. ئەركێ دادوەری چەسپاندنا قانوونێیە نەك دەستخوەشیكرن ل وان یێن چەندین سالە ژ دەرڤەی قانوونێ كار دكەن».
وی ئەندامێ كۆنگرێسێ ئەمریكا رۆهنكر ژی» ئەڤ سەرەردەرییە نیشا د دەت كو گۆپیتكا دەستهەلاتا دادوەری ل ئیراقێ، ل شوونا بلندڕاگرتنا سەروەرییا قانوونێ، بوویە سەكۆیەك بۆ هنارتنا پەیامێن سیاسی ل بن پەردەیا قانوونێ. ئەڤە مەزنترین گەفە ل سەر دادپەروەریێ و قەوارەیا دەولەتێ و تنێ ئەو چەندە دووپات دكەت كو دادوەری ل ئیراقێ ژ ئەركێ خوە یێ راستەقینە لادایە».
فائیق زێدان، سەرۆكێ جڤاتا بلند یا دادوەریێ ل ئیراقێ، راگەهاندبوو « گرۆپێن چەكدار گەهشتینە رێككەفتنێ بۆ دانانا چەكی د دەستێ دەولەتێدا».
زێدانی د بەیاننامەیەكێدا سوپاسییا سەركردەیێن گرۆپێن چەكدار كربوو كو هاریكار بوون د چەسپاندنا سەروەرییا قانوونێ و رووكرن بەر ب كریارێن سیاسی، ئاماژە ب وێ چەندێ ژی كربوو، د نوكەدا پێدڤییەكا نیشتمانی بۆ كریارێن سیاسی نەمایە».
دەمێ چەند مەهایە ئەمریكا گڤاشتێن توند ئێخستینە سەر حوكمەتا ئیراقێ بۆ هەلوەشاندنا گرۆپێن چەكدار و رێگریكرن ل پشكدارییا وان د حوكمەتا نوو دا، ژ ئالییەكێ دی ڤە، ل مەها بۆری نوری مالكی، سەرۆكێ هەڤپەیمانییا دەولەتا قانوونێ، ئاماژە ب پێنگاڤان بۆ رادەستكرنا چەكێ گران یێ فراكسیۆنان ب دەولەتێ دابوو.
