دەستپێکرنا ھەڤرککێن خولا عیراقێ ئەڤرۆ د گومانێ دایە
ئەڤرۆ نيوز:
بریارە ھەڤرکیێن وەرزێ نوو یێ خولا عیراقێ یا تەپا پێ بو یانێن پلا نایاب ئەڤرۆ ب کرنا پێنج یاریان دەستپێبکەن، لێ گومانا ھەی کو دادڤان ببنە ئەگەرێ پاشخستنێ.
د یاریێن حەفتیا ئێکێ دا بریارە تیما تەپا پێ یا یانا دھوک ل یاریگەھا خوە ئەڤرۆ مێڤانداریا تیما تەپا پێ یا یانا نەفت جنوب بکەت کو ھەردو یانا ھەتا رادەکێ باش بەرھەڤیکرینە کو ب ئاستەکێ باشتر ژ وەرزێ بوری بھێنە دیتن و ھەر ژ دەستپێکێ دیار بکەت ئەو ھەڤبەست و کەمپ و یاریێن ھەڤالینی یێن کرین مفا ژێ دیتیە.
ھەر ژ یاریێن ئەڤرۆ دێ ھێنە کرن نەفت د گەل کەھربا، زەوار دێ مێڤانداریا کەرخ کەت، نەفت وەسەت د گەل تەلەبە و سەماوا د گەل نەفت میسان.
یاریێن حەفتیا ئێکێ یێن کوما دویێ سوبەھی دێ ب دووماھی ھێن کو زاخۆ دێ مێڤانداریا مینا کەت و ھەولێر دێ پێشوازیا ئەمانا یا بەغدا کەت ل گەل ھەبونا سێ یاریێن دی ئەوژی جەویە د گەل شورتە، سیناعە د گەل حدود و کەربەلا د گەل نەجەف.
گومانا دەستپێکرنا یاریێن خولێ ئەڤرۆ یا ھەی ب ئەگەرا نە رازیبونا دادڤانێن خولێ و بریار دان ب مانگرتنێ و نە رێڤەبرنا یاریان تاکو مافێن وان یێن وەرزێ بوری ب تمامەتی بو نەھێنە ئەداکرن ھەر چەندە داخوازیا وان یا ھەلوەشاندنا لژنا بەریکانەیان بەری ماوەکی ھاتە ب جە ئینان و سەروکێ لژنێ تارق ئەحمەد ھاتیە دوورخستن.
