دەستەكا نوو یا فدراسیۆنا فوتبۆلا پارێزگەهێ هاتە هەلبژارتن
قەیس وەیس:
دوهی ب شێوەیەكێ فەرمی هەلبژارتنێن دەستەكا نوو یا فدراسیۆنا فوتبۆلا پارێزگەها دهۆكێ ل هۆلا ئۆتێلا سەرگەلی هاتە ئەنجامدان، ئەوا ب پشكدارییا هەموو نوونەرێن یانەیێن پارێزگەهێ و نوونەرێ دادڤانان و نوونەرێ ڕاهێنەرێن پارێزگەها دهۆكێ هاتییە كرن هەروەسان عەلی جەبار چێگرێ ئێكێ یێ فدراسیۆنا فوتبۆلا ئیراقێ بەرهەڤبوو.
دەنگدان بۆ سەرۆكاتییا فدراسیۆنێ دناڤبەرا دو كەسان هاتنە كرن، د. ئەحمەد قاسم و عەلی وەحیدەدین، پشتی پرسێس هاتییە كرن تێدا د. ئەحمەد قاسم رێژەیا 10 دەنگ شیا ب سەركەڤیت د بەرانبەر دا پێنچ دەنگان بۆ عەلی وەحیدەدین هاتنە هژمارتن.
بۆ پۆستێ چێگرێ سەرۆكێ فدراسیۆنێ ل دەستپێكێ سێ كەسان خوە بەربژاركربوو، لێ هەر ئێك ژ د. محەمەد سەعید محەمەد و فەرزاد محەمەد عەلی خوە ژ هەڤڕكییا دەنگدانێ ڤەكێشان، دەرئەنجام ب تەزكییە ئەحمەد حسێن بۆ جێگرێ سەرۆك فدرسیۆن هاتە دەستنیشانكرن.
ژلایەكێ دووڤە بۆ پۆستێ ئەندامەتییا فدراسیۆنێ چار كەسان هەڤڕكی بۆ هەرسێ پۆستێن ئەندامەتیێ كر و دەرئەنجام بڤی شێوەیی بوو، عەبدولرەحیم حاجی 13 دەنگ، ئازاد مەقسود 13 دەنگ، نەهلا ئەحمەد نەهـ دەنگ، خوزی حەمید پێنچ دەنگ، هەر بۆ زانین عەبدوللا عابد ئێك ژ بەربژاران بوو خوە ژ پرۆسەیا دەنگدانێ ڤەكێشابوو.
ل دۆر ڤێ یەكێ عەلی جبار نوونەر و جێگرێ فدراسیۆنا فوتبۆلا ئیراقێ گۆت: ئەم پیرۆزباهیێ ل سەركەڤتیان دكەین و ب هیڤییا وێ یەكێ بشێن خزمەتا وەرزشا پارێزگەها خوە بكەن، كەسانێن خودان شیانن و گەنجن، پارێزگەها دهۆكێ ب گشتی حەز ژ وەرزشێ و فوتبۆلێ دكەن ئەڤ ئەندامێن نوو د شێن پێنگاڤێن باش پاڤێژن و دەستخوەشییا كارگێرییا پێشتر یا فدراسیۆنێ دكەین ئەوان ژی كارەكێ باش ئەنجامدایە.
