دەستەیا نوو هاتە هەلبژارتن و كچەك ژی بوو ئەندام
دوهی د ڕێورەسمەكێ بەرفرەهـ دا ب ئامادەبوونا 242 كەسان ژ دەستەیا گشتی یا یانەیا دهۆك، پرۆسەیا هەلبژارتنێن یانەیێ ب کەش و ئاوایەكێ ئارام بڕێڤەچوو ئەوا هەشت كەسێن پێشتر د كارگێرییا یانەیێ دا دگەل هەردو ئەندامێن دەستەیا گشتی دلین كەمال وەكو كچ و عەلی موستەفا خوە بۆ ئەندامەتییا كارگێرییا نوو بۆ چار سالێن داهاتی هەلبژارتن.
ئەنجامێن گشتی یێن دەستەیا كارگێریێ بڤی شێوەیی بوون، د. عەبدوللا جەلال، یوسڤ رەشید، جاسم محەمەد حاجی، خالد موشیر، هشیار فەریق، ڕێگر سلێمان، خالد محەمەد، مللەت جەمال، عەلی مستەقا، دلین كەمال.
ل دۆر ڤێ یەكێ جەمال سلێمان ڕێڤەبەرێ وەرزشی ل پارێزگەها دهۆكێ بۆ رۆژنامەیا ئەڤرۆ گۆت: دەستپێكێ سۆپاس بۆ خودێ ئەڤ پرۆسێسە ب سەركەڤتیانە و بێ ئاریشە ب دووماهی هات، ژ سەرجەمێ 242 كەسان مافێ دەنگانێ هەبوو، کەش و ئاوایەكێ ئازاد و بێ ئاریشە ب دووماهی هاتن، سۆپاسییا هەموو لایەكی دكەین تایبەت پارێزگارێ دهۆكێ و بەرپرسێ لەقێ ئێك یا پارتا مە یا تێكۆشەر كو ئەڤ پرۆسیەیە ب شێوەیەكێ شەفاف و دۆڤچوونەكا باش بۆ سەركەڤتنا پرۆسێسێ دهاتە كرن، ب گشتی 10 كەسان خوە بەرپرژار كربوو، هەشت ژ وان كارگێرییا پێشتر بوو و دو نوو هاتنە دناڤ دا، هەموو ل دووڤ یاسایێ و دەنگێن پێدڤی ئینان و بوونە دەستەیا نوو یا كارگێریێ.
هەروەسان ناڤهاتی گۆت: ئەم پیرۆزباهیێ ل دەستەیا نوو دكەین ب هیڤییا وێ چەندێ ئەو دەستكەڤت و پێشكەڤتێن سالێن بۆری دوبارەبنەڤە و پتر خزمەتا وەرزشڤانان بهێتە كرن، ل دووڤ یاسایێ ئەو كەسێن ب دەركەڤن ژ پێنچ ئەندامان كێمتر نەبیت و 10 ئەنداما زێدەتر نابیت، دووڤدا دێ كارگێرییا نوو دكۆمبوونا خوە یا ئێكێ دا سەرۆك، جێكر، سكرتێر و ڕێڤەبەرێ دارایی دەستنیشانكەن ب شێوەیێ دەنگدان و دێ بۆ ب نڤێسارەكا فەرمی هێتە هنارتن.
جەمال سلێمانی ئەوچەندە ژی گۆت: پشتی ب دووماهی هاتنا هەلبژارتنێن یانەیا دهۆك، دەمێ بهێت دا دێ خشتەیەكێ تایبەت ب رۆژ و ژڤان بۆ هەموو یانەیێن مایی ل سنۆرێ پارێزگەها دهۆكێ كو دبنە 16 یانە یێن هەلبژارتنان بكەن ئەوا دهێتە پێشبینیكرن ل دەستپێكا مەها بهێت بۆ هەر یانەیەكێ ژڤان بهێتە دانان.
ژلایێ خوەڤە د. عەبدوللا جەلال سەرۆكێ یانەیا دهۆكێ گۆت: پێخوەشحالین بۆ چار سالێن داهاتی بووینە جهێ باوەرییا جەماوەرێ خوە، بۆ چار سالێن داهاتی دێ هەموو بزاڤان كەین باشتر و پێشكەڤتیتر بین، هەكە كێماسیەك یا خەلەتیەكا سالێن بۆری هەبووینە دێ چارەسەركەین، مە پلانێن باشتر هەنە بۆ چار سالێن بهێت و بەردەوامیێ ب گرنگیدانێ ب هەموو یارییان دەین، سۆپاسییا سەرۆكێ حوكمەتا هەرێمێ ڕێزدار مەسرۆر بارزانی دكەین ژبۆ پشتەڤانییا وی یا بەردەوام.
بۆ زانین ئەو 17 یانەیێن پارێزگەهێ دێ هەلبژارتنان كەن هەر ئێك ژ، دهۆك، ئاكرێ، ئافرەتێن دهۆك، گارە، شێلادزێ، سێمێل، تەناهی، سەنحاریب، ئامێدیێ، شێخان، بەردەرەش، دینارتێ، پۆلیتەكنیك، فرۆكەڤانی- بەرەگلاید-، میدیا یا خودان پێدڤیێن تایبەت، پیرس، بجێل.
