دەستەیا وەبەرهێنانێ: ل پڕانیا دەڤەرداریان دەڤەرێن پیشەسازی دێ هێنە دانان
رێڤەبەرێ گشتیێ مۆهلەتدانێ ل دەستەیا وەبەرهێنانێ دیار كر، كابینەیا نەهێ یا حوكمەتا هەرێما كوردستانێ گەلەك گرنگی ب كەرتێ پیشەسازیێ دایە و ژ سەرجەمێ 280 پڕۆژەیێن مۆهلەت پێ هاتییە دان، 80 ژ وان پڕۆژەیان یێن پیشەسازی نە و دبێژیت: وەسا بڕیارە ل پڕانیا دەڤەرداریێن هەرێما كوردستانێ دەڤەرێن پیشەسازی بهێنە دانان، لەوما گرنگیەكا زۆر ب كەرتێ پیشەسازی دهێتە دان.
د. هەڤال سەدیق بۆ رۆژناما ئەڤرۆ گۆت: «ل دەستپێكا كابینەیا نەهێ یا حوكمەتا هەرێما كوردستانێ كەرتێ پیشەسازی ئێك بوویە ژ وان كەرتان، كو حوكمەتا هەرێمێ گەلەك گرنگی پێدایە، چونكی ئەو كەرتە دێ دەلیڤێن كاری پەیدا كەت و كەرەستەیێن خاڤ دێ د ناڤا هەرێمێ دا هێنە ب كارئینان، كەرتێ پیشەسازی دێ بیتە ئەگەرێ ساخكرنا بەرهەمێ ناڤخوەیی و كێمكرنا ئینانا بەرهەمێن بیانی، دیسا مە بزاڤ كرینە، كو پشتبەستنێ ل سەر بەرهەمێن ناڤخوەیی بكەین، لەوما مە گەلەك مۆهلەت داینە پڕۆژەیێن پیشەسازی، ڤێ چەندێ گەلەك گرنگیا خوە بۆ ئاسایشا خوارنێ هەیە، دیسا ئەڤە دێ بیتە خالەكا گرنگ بۆ هەرێما كوردستانێ و ل پڕانیا دەڤەرداریان دێ دەڤەرێن پیشەسازی هێنە دروستكرن و دێ كارگەهێن مەزن ل وان دەڤەران هێنە چێكرن».
ناڤهاتی گۆتژی: «ل گەلەك جهان ل هەرێما كوردستانێ وێ پرۆسێ دەستپێكرییە و د كابینەیا نەهێ یا حوكمەتا هەرێما كوردستانێ دا ژ سەرجەمێ 280 پڕۆژەیێن مۆهلەت پێ هاتییە دان 80 پڕۆژە ژ وان، د بیاڤێ پیشەسازییێ دانە و 2 ملیۆن دۆلار ژی بۆ وان پڕۆژەیان هاتینە مەزاختن».
