دەست ب بەرهەڤیان بۆ مەزنترین كەرنەڤالا نەورۆزێ ل ئاكرێ هاتیە كرن
رەمەزان زەكەریا:
ل گەل نێزیكبوونا جەژنا نەورۆزێ و سەرێ سالا كوردی، باژێڕێ ئاكرێ، كو ب پایتەختێ نەورۆزا كوردستانێ دهێتە ناسین، خۆ بۆ كەرنەڤالەكا مەزن بەرهەڤ دكەت.
گروپێن خۆبەخش یێن گەنجێن باژێڕی، چەندین رۆژە ب گەرمی دەست ب بەرهەڤكرنا خەتیران كریە، دا كو ئەڤ سالە ب شێوازەكێ جوداتر ژ سالێن بۆری، ئاگرێ نەورۆزێ ل سەر كێل و چایێن ئاكرێ بلند بكەن.
ل دەستپێكا مەها ئادارێ، كاروانێ ئامادەكاریان ل ئاكرێ دكەڤیتە رێ و گروپێن خۆبەخش یێن گەنجان، ب كەرەستێن دەستی، دەست ب دروستكرنا سەدەهان خەتیران دكەن.
ئاكرێ ب تایبەتمەندیا خوە یا جۆگرافی و رێورەسمێن خوە یێن جودا، سالانە دبیتە قیبلەگەها گەشتیاران و دەزگەهێن راگەهاندنێ یێن جیهانی و ئیراقی.
بڕیارە ئەڤ سالە مەزنترین كەرنەڤال ل سەر ئاستێ كوردستانێ ل ئاكرێ بهێتە ئەنجامدان، گروپێن گەنجان ب مەشخەلێن ئاگری، ب رێورەسمەكێ جوان دێ بەرەڤ سەرێ كەلێ و گرێن باژێڕی چن.
ئامادەكاری هەتا شەڤا نەورۆزێ دێ دبەردەوام بن، دا كو دیمەنەكێ ئەفسانەیی نیشا جیهانێ بدەن.
