دەست ب دروستکرنا نەخوشخانەکێ ھاتەکرن
ئەڤرۆ نیوز، نەوزاد ھلۆری:
ب مەرەما زێدەتر خزمەتکرنا کەرتێ ساخلەمیێ، نەخوشخانەکا حوکمی ل ناحیا پیران یا سەر ب قەزا مێرگەسوور دھێتە چێکرن، قایمقامێ قەزا مێرگەسوورێ دیارکر کو پشتی داوی ھاتنا ئەوێ نەخوشخانێ دێ کار لسەر ھندەک نەخوشخانە و بنگەھێن دن یێن ساخلەمیێ ژی ھێتەکرن.
غەفور ئەحمەد قایمقامێ قەزا مێرگەسوور بۆ ئەڤرۆ نیوز گۆت: (ب مەرەما زێدەتر خزمەتکرنا کەرتێ ساخلەمیێ، پشتی دو سالێن راگرتنا کاروبارێن نەخوشخانێ، ئەڤرۆ جارەکا دی کار د چێکرنا نەخوشخانا پیران ل ناحیا پیران ھاتەکرن و ب پشتەڤانیا خودێ دەمەکێ نێزیک دێ ھەموو کاروبارێن وێ داوی ھێن و کەڤیتە د خزمەتا خەلکی دا).
ناڤهاتی زێدەتر گۆت: (نەخوشخانا پیران ب شێوە و ستایلەکێ سەردەم دھێتە چێکرن و چەند نوژدارێن بسپور دێ تێدا کار کەن و خزمەتەکا باش بۆ خەلکێ دەڤەرێ کەت، ھەر چەندە دڤیا زووتر ھاتبایە چێکرن، بەلێ ژ ئەگەرێ قەیرانا دارایی کاروبارێن وێ ب خاڤی ب رێڤەچوون و نوکە پتری ٤٠% کاروبارێن وێ داوی ھاتنە).
ناڤبری دیارکر ژی کو ئەو دێ کار لسەر دروستکرنا چەند نەخوشخانە و بنگەھێن دن یێن ساخلەمیێ بۆ دەڤەرێن دی ژی کەن کو ھەتا نوکە نەخوشخانە و بنگەھێن ساخلەمیێ لێ نینن.
