دەست ب نووژەنكرنا هەردو قەسرێن دولبێ و كەمبەلانی هاتە كرن
دهۆك، ئەمیر ئەترووشی:
رێڤەبەرێ شوونوار و كەلەپوورێن پارێزگەها دهۆكێ دیاركر، ب پشتەڤانیا حوكمەتا هەرێما كوردستانێ ل سەر داهاتێ وەزارەتا شارەوانی و گەشتوگوزارێ، دەست ب نووژەنكرنا هەردوو قەسرێن دولبێ و كەمبەلانی-كەمبەرلاند هاتە كرن.
د. بێكەس بریفكانی، رێڤەبەرێ شوونوار و كەلەپوورێن پارێزگەها دهۆكێ بۆ رۆژنامەیا ئەڤرۆ راگەهاند، ئەڤ پرۆژە ل ژێر چاڤدێرییا رێڤەبەریا گشتیا شوونواری و كەلەپووری ب هەماهەنگی دگەل رێكخراوا (The lotus flower) كۆ (35) كرێكار ژلایێ وانڤە هاتینە دابین كرن دهێتە بجهئینان.
ئاشكرا كر، ئاڤاهیێ قەسرا كەمبەلانی- كەمبەرلاند ـ ئێك ژ ئاڤاهیێن گرنگە كۆ دكەڤیتە سەنتەرێ باژێرێ دهوكێ، دهۆكا كەڤن خودان تەلارسازیەكا بالكێشە، دسالا (١٩٢٧)دا هاتیە ئاڤا كرن ژ لایێ (روجر كرێغ كەمبەرلاند”١٨٩٤-١٩٣٨”) ئەڤە ببوو جهێ حەواندنا وی، دكەڤندا هاتبوو بكارئینان وەك نەخۆشخانەك و پاشان چەند سالەكا هاتە بكارئینان وەك بنگەهەكێ سەر ب رێڤەبەریا پوستە و گەهاندنێ، د نوكەدا رێڤەبەریا شوونوار و كەلەپوورێن دهۆكێ دەست ب نووژەنكرنا ڤی ئاڤاهی كریە بۆ پاراستنا ڤێ تەلارسازیێ كۆ د پاشەرۆژێ دا مفا ژێ بهێیە وەرگرتن بۆ مەرەمێن شوونواری.
گووتژی، ئاڤاهیێ (قەسرا دلبێ) دكەڤێتە گوندێ دلبێ یا سەر ب قەزا سێمێلێ كۆ ئاڤاهییەكە ب شێوازەكێ جیاواز هاتیە ئاڤاكرن ژلایێ بیناسازی و تەلارسازیێ، ئەڤ ئاڤاهییە د ناڤبەرا سالێن (١٩٠٠-١٩٠٥) هاتیە ئاڤاكرن ژلایێ (الحاج محمد سلیمان النائب) یێ ناڤدار ب (حجی محمد ئەفەندی النائب»١٨٧٥-١٩٣٩») ئێك ژ كەساتیێن ناڤداربوویە ل دەڤەرێ و خودان پێگەهەكا جڤاكی بوویە و پەیوەندییەكا مكوم هەبوویە دگەل مەلیكێ عیراقێ، ئەڤ ئاڤاهیە ل جهەكێ بلند هاتیە ئاڤاكرن، نووژەنكرنا ڤی ئاڤاهی دێ مفایەكێ گرنگ هەبیت د پاشەرۆژێ دا بۆ مەرەمێن گەشتیاری یا شوونواری.
