دەست ب چێكرن و قێركرنا جاددەیا گوندێ سەرگەلێ هاتە كرن
ئامێدیێ، مەحمود نهێلی:
ژ بۆ پتر گرنگیدان ب كەرتێ خزمەتگوزاری و گەهاندنا پڕۆژەیان بۆ گوندان، دەست ب چێكرن و قێركرنا رێكا گوندێ سەرگەلێ هاتە كرن و بڕیارە د دەمێ خوە یێ دیاركری دا ب داوی بهێت و بكەڤیتە د خزمەتا وەلاتیان دا.
ئەندزیار نزمی، ئەندازیارێ سەرپەرشتێ پڕۆژەی بۆ رۆژناما ئەڤرۆ دیار كر، ئەڤ پڕۆژە؛ د چارچوڤێ وان پڕۆژەیان دایە ژ بۆ گەهاندنا جاددەیان و پڕۆژێن خزمەتگوزاری بۆ گوندێن دەڤەرا ئامێدیێ و گۆت: «ئەڤ پڕۆژە پێك دهێت ژ چێكرن و قێركرنا رێكا گوندێ سەرگەلێ ب درێژاهیا هزار و 500 میتران، هەر ژ جاددەیا سەرەكی یا د ناڤبەرا دێرەلۆكێ و ئامێدیێ دا هەتا دگەهیتە د ناڤ گوندێ ناڤبری دا و دەرباز دبیت».
ناڤهاتی دیار ژی كر، ژ بۆ ئەنجامدانا ڤی پڕۆژەی پتر ژ 200 ملیۆن دیناران هاتینە تەرخانكرن، دیسا بەری نوكە ژی جاددەیێن چار گوندێن ڤێ دەڤەرێ هاتـبوونە چێكرن و گۆت: «جاددەیا گوندێن مژێ و كەڤنە مژێ و سپیندارێ و گرگاش ب درێژاهیا پێنج كیلۆمەتران هاتبوونە چێكرن و نێزیكی ملیار دیناران بۆ هاتبوونە تەرخانكرن و نوكە جاددە ب داوی هاتیە و كەفتیە د خزمەتا خەلكێ دەڤەرێ دا».
