دەلیڤەیا كاری بۆ هەژمارەكا دەرچۆیان ل سەرسنكێ دهێتە پەیداكرن
پشتی هەژمارەكا دەرچوویێن كۆلیژ و پەیمانگەهان پشكداری د دو خۆلێن فێركرن و هشككرنا فێقی دا كری باوەرنامە وەرگرتن و د داهاتی دا دێ بنە خودانكار و پڕۆژەیێن چاندنێ.
نیبار شینۆ، رێڤەبەرێ راهێنانێن پیشەیی ل پارێزگەها دهۆكێ بۆ رۆژناما ئەڤرۆ دیار كر، ئەڤ خۆلە ژ لایێ رێڤەبەریا وان ب هەڤكای ل گەل رێڤەبەریا چاندنا دەڤەرداریا ئامێدیێ و ب هاریكاریا رێكخراوا (I L O) و ب پشتەڤانیا دارایی یا حوكمەتا هۆلەندا ڤە هاتبوو ڤەكرن و گۆت: “مە بەرهەمێن پشكدارێن خۆلێ بۆ بەرهەڤبوویان نیشادان، هەموو بەرهەمێن خوەمالی بوون و بێ ب كارئینانا كەرەستەیێن كیمیایی هاتینە هشككرن، پشكدارێن خۆلێ دشێن پشتی ڤان بەرهەمان دروست دكەن ل بازاری یان ب رێیا ئۆنلاین ب فرۆشن”.
ناڤهاتی دیار ژی كر، ژ بەر كو دەڤەرا ئامێدیێ دەڤەركە ژ لایێ چاندنێ ڤە یا بەرنیاسە، ژ بەر وێ یەكێ ئەڤ دەڤەرە هاتیە هەلبژارتن بۆ ڤەكرنا ڤان خۆلان.
ب بەرهەڤبوونا هەژمارەكا بەرپرسێن حزبی و حكومی دو خۆلێن فێركرن و هشككرنا فێقی ل ناوچەداریا سەرسنكێ ب داوی هاتن، كو ژ لایێ رێڤەبەریا راهێنانێن پیشەیی ڤە هاتـبوونە ڤەكرن و 32 كەس تێدا پشكداربوون و بۆ دەمێ 45 رۆژان یا بەردەوام بوو.
ژ لایەكێ دیڤە هەر ل هەمان دەڤەر، كەلوپەل و پێدڤیێن چاندنێ ل سەر 186 جۆتیارێن داڤەرداریا ئامێدیێ هاتنە پارڤەكرن.
ئەندازیار هەكا حەمید، رێڤەبەرێ چاندنا ئامێدیێ بۆ رۆژناما ئەڤرۆ دیار كر، ب هەڤكاری ل گەل دەڤەرداریا ئامێدیێ و رێڤەبەریا گشتیا چاندنا دهۆكێ و ب پشتەڤانیا دارایی یا رێكخراواپاراستنا زارۆكان save the children كەلوپەل و كەرەستەیێن چاندنێ ل سەر 186 پشكداربوویێن خۆلێن گەشەپێدانا چاندنێ و خوارنا ساخلەم هاتنە پارڤەكرن.
