دەما دۆمان ژ سلێمانیێ بلند دبیت ل دهـۆكێ دكەڤیتە چاڤان
عـەمەر هـەرگـۆشی
جاران دا بێژن جان و روحا كوردان ئێكە و برینا وان ل كودەرێ بیت، ئێك ژانا گیانەكیە و زۆرداریا ل سەر وەلاتیان ل كودەرێ بیت ژان ئێكە، پێدڤیە خەلكێ كوردستانی پتر د هەوارا هەڤدو بچن و پتر خەمخۆرێن هەڤدو بن، ئەڤرۆ كوردان زۆر پێدڤی یا ب خۆشەویستیێ و رێز و تەبایێ هەی، جهێ داخێ یە كو كورد نوكە خۆدانێن پەیامەكا ئێكگرتی نینن و چاڤا لایەنێن كوردی ژێكدویر كەفتینە ب ڤێ رەنگی ژی دویركەتن د ناڤ تاكێن جڤاك و پێكهاتێن وێ دروست بوویە، هندەك لایەن ل سەر هندێ كاردكەن كو جوداهیان د ناڤبەرا ئەندامێن جڤاكا دا مەزن بكەن رەشبینیێ و كەربوكینان زێدە بكەن، ل ئەگەرا وێ چەندێ ژی گیانێ دوبەرەكی و ناڤچەگەری و توندرەوی چێدبیت و نەك هەر د هەوارا ئێك ناچن د تەنگاڤیان دا و هەڤكاریا ئێكودو ناكەن بەلكی كەیڤا وانا دهێت كو هندەك تووشی كارەساتان و مالوێرانیان ببن، ئەوە ب راستی ئەنجامێن هزرێن چەوتن و ئێكە ژ بەدبەختیێن گەلێ مە، ل سەر مرۆڤی پێدڤیە كو د هەمی كاڤدانان دا خەم خورێ گەلێ خۆ بیت و ل گەل خۆشی و ناخۆشیێن میللەتێ خۆ تێكەل بیت، ئەو كارەساتا لالەزار كەیفا هندەك كەسان یا ئینای، بەلێ ب راستی دڤیا دلێ هەمی كوردەكی ژانێ بكەت دەما كو خوین ژ گیانێ وەلاتیەكی كورد دهێت، ئەڤ رۆندكا ژ چاڤێن هەر دایك و بابەكێ كورد بهێت لازمە خەما هەمی كوردەكی خۆدان وژدان بیت، ژبلی هندێ كو ئەوا ل لالەزار روویدای زیانێن گیانی هەبوون كاریگەریەكا خراپ ل سەر ناڤودەنگێ هەرێمێ و دیموكراتیەت و شكۆمەندیا هەرێمێ هەبوو، لەوما دڤیا كورد ل هەر جهەكی بن دلێ وان ب ڤێ كارەساتێ خۆش نەبیت و ل هەر جهەكی بپەرۆشبن، ئەركێ هەمی كوردەكییە ل بەرانبەر كریارێن هۆسا هەلوەستێ نەتەوەیی هەبیت و هەولبدەت ئەو كریارێن وەسا تەشەنە نەكەن و دوبارە نەبنەڤە، چونكی ئەو كریار دێ دەرزات د ناڤبەرا پێكهاتێن كوردی دا فرەه كەن و دێ بنە ئەگەرا رق و كینا د ناڤ جڤاكێ دا و شوین پێن دوژمن و ناحەزان د ناڤ رێزێن گەلێ كورد دا ب هێزترلێهێن كاریگەریەكا مەزن دێ كەتە سەر رەوشا ئێمناتیێ و ژیانا خەلكێ كوردستانێ.
پێدڤیە لایەنێن كوردی روویێ راستەقینەیێ ئاشتیخوازی و مرۆڤ دۆستیێ گەلێ كوردستانێ نیشا گەلێن جیهانێ بدەن و هیچ بەهانەكێ نەدەنە دەست ناحەز و دوژمنێن كوردستانێ كو پێگەهێ حوكمەت و پەرلەمانێ كوردستانێ ل سەر ئاستێ ناڤچێ و جیهانێ سڤك بكەن وە هەمی جاران گرفت و كێشەیێن ناڤخۆ ب رێكێن گفتوگۆیێ وە برایەتی و ب گۆرەی قانوونێ بهێنە چارەسەركرن.
دڤیا ئەم هەمی بزانین كو باب و باپیرێن مە ب خوینێ و ئارەقا ماندیبوونێ ناڤودەنگێ گەلێ كوردستانێ یێ پاراستی و وەك مللەتەكی ئاشتیخواز و بندەست یێ هاتیە ناسكرن، هەرگیز رەوا نینە ئەڤرۆ ئەم د ناڤ خۆدا ل دژی هەڤدو دەست بدەینە چەكی، ئەڤە كارەكێ نارەوایە و نابیت دلێ چ كوردەكی ب ڤێ چەندێ خۆش بیت.
لەوما حەقە كو دۆمان ژ سلێمانیێ بلند دبیت ل دهۆكێ بێهنا مە تەنگ ببیت، چونكو ئەم ئێك گیانین و ئێشا مە ئێكە.
