دەمـێ ب سەرچـوونـێ
غیاس خـالد زێباری
هەر كەل و پەلەكێ خوارنێ دەمەكێ دیاركری هەیە بۆ ب كارئینانێ، ل هەمی وەلاتان چاڤدێریەكا چڕ ل سەر كەل و پەلان، چونكی ب كارئینانا وان ل دەمێ ب سەرداچوونێ مەترسیێ ل سەر ژیانا خەلكی دكەت، هەر چەندە ل هەرێما كوردستانێ ژی ئەڤ چاڤدێریا بەردەامە و ژ بوو پاراستنا ساخلەمیا خەلكی حوكمەت بەردەوام د چاڤدێریێ دایە و زۆربەی خودان ماركێت و فرۆشیار ژی د هەڤكارن و رۆژانە ل كەناڵێن راگەهاندنێ دا دیار دبیت كو ئەڤ كەل و پەلە دهێتە ژناڤبرن، ئەڤە ژی جهێ دلخۆشیێ یە، ژ هەر دوو ئالیان، لێ ئەوا من تیبینی كری و دیتی هندەك كەل و پەل ب تایبەت یێن شیرەمەنی كو زوو تۆشی خراب بوونێ بیت، دەمێ ب سەرداچوونا وان یان ل جهەكێ بەزر دایە و ڤەدیتنا وان یا ب زەحمەتە یان ژی ل جهەكێ تاری دایە و ناهێتە دیتن، زۆر جاران من ڤیایە تشتەكی بكڕم لێ ژبەر نە دیاربوونا مێژوویا ب سەرچوونێ، ل گڕینی پەشێمان بوونە، ئەگەر من چەند پێدڤی ژی پێ هەبیت، چونكی ساخلەمیا مرۆڤی ژ هەمی تشتی مەزنترە.
پێدڤی یە ئالیێن پەیوەندیدار یێن حوكمەتا هەرێما كوردستانێ و ئەو ئالیێن چاڤدێریا بازاری دكەن، ب هووربینیتر چاڤدێریا ڤێ چەندێ بكەن و بازرگان و خوەدیێن ماركێت و فرۆشگەهان ئاگەهدار بكەت، رێ نەدەن متا و كەل و پەلێن دەمێ ب سەرچوونێ لێ دیار و بەرچاڤ نەبیت بهێتە فرۆتن، دبیت یێ نوو ژی بیت لێ دبیتە جهێ گۆمانێ. داكو مەترسی ل سەر ساخلەمیا خەلكی درۆست نەبیت.خەلكی ژی پێدڤی یە رەوشەنبیریا ڤێ چەندێ هەبیت، بەری كڕینا هەر تشتەكی مێژوویا ب سەرچوونێ بزانیت و بزانیت ئەو متایێ د كڕیت پشكا چەند رۆژان دكەت.
چونكی ڤی سەردەمی هندەك وەلات سەختەكاریێن رێكخستی ل بازرگانیێدا دكەن و كەل و پەلێن كەڤن و ب كێرنەهاتی ل ناڤ وەلاتێن دیتر ساخ دكەن . مەترسیا ڤێ ژی مینا مەترسیا ماددەیێن بێ هۆشكرنێ یە د ناڤ جڤاكی دا، كو ڤان ساڵێن داویێ پێلێن وێ ب رەنگەكێ رێكخستی بەرەڤ هەرێما كوردستانێ دهێن و رۆژانە سازیێن ئێمناهیێ و پەیوەندیدار دەستەسەر دكەن و بووینە مەترسی ل سەر جڤاكێ كوردستانێ . خودێ نەكەت كەل و پەلێن دەم ب سەرداچوویی ژی ب بەرفرەهی بەڵاڤ ببن مەترسیەكا دژوار دێ ل سەر ساخلەمیا خەلكی كەت.
