دەمـێ چەوسـاندنـا كـوردان بۆری
زهێر كۆرەماركی
د دیرۆكێ دا چ مللەت هندی كوردان ب دەستێ داگیركەرێن كوردستانێ نەهاتینە ئێشاندن و ئازاردان، ڤان داگیركەرێن زالم چ نەمایە ل گەل كوردان نەكری، ئەو نەكریە یا نەشیاین بكەن. وەلێ كورد هەرمان و ب سەر زۆلما وان سەركەفتن و بوونە خودان نیمچە سەربەخۆیەك و چاڤێن نەحەز و دوژمنان شۆڕبوون و نەچاربوون كو ڤی كەتوارێ هەیی قەبوول بكەن، سەرەدەریێ ل گەل بكەن. ئەگەر ئەم ئاوریەكی ل كاودانێن ئەڤرۆ بدەین و ئەو گوهۆڕینێن د رۆژەڤێ دا دهێنە دیتن و رۆژ بۆ رۆژ دەرگەهێن مەزن و ئاسۆیێن گەشتر بەرامبەر دۆزا كوردان ڤەدبن و پتر پشتەڤان و هەڤال و دۆست بۆ پەیدا دبن، چێد بیت ئەڤە بەرهەمێ هەستكرنا وان بیت بەرامبەر وێ غەدرا مەزنا دیرۆكی ئەوا وان ل كوردان كری كو بۆ بەرژەوەندیێن خۆ، وەلاتێ وان پارچە پارچەكری، چێدبیت ئەو هەست ب گونەهێ و ئێشاندنا وژدانا خۆ بكەن، لەوا ئەڤرۆ یێن بزاڤان دكەن دەستان ژ هەڤالێن دوهی بەرددەن و بێنە پاڵ دۆزا كوردی و بەحسێ گوهۆڕین ریشەیی بكەن و دلێ دۆستێن خۆ یێن دوهی بئێشینن و لێ وەرگەرن، وەلێ ب دیتنا مە ئەڤە بەس نینە دڤێت داخوازا لێبۆرینی ژ هەمی گەلێ كورد بكەن و قەرەبۆیا زیان و زەڕەرێن مادی و مەعنەوی یێن كوردان بكەن.
ئەگەر مرۆڤ خواندنەكێ بۆ ڤان كاودانێن نوكە بكەت؛ دێ رۆن و زەلال بیت و دێ هەست كەت كو ئێدی عەورێن رەش یێن چەوساندنا كوردان، هێدی هێدی یێ خیڤەتێن خۆ دپێچن و بەر ب مقمقێ ڤە دچن! چونكی جیهان نەجیهانا جارایە و ئەڤرۆكە یا د شلەژانێن گوهۆڕینان دا دەربازدبیت و یا هندەك نەتەوەیێن بندەست و غەدرلێكری بسەردئێخیت و هندەك دەولەتێن زالم و دكتاتۆر ببن پێلێن خۆ دئێخیت، ئەگەر نە خەندقینیت، دكەتە چەند پارچە و تەڕابەڕا دكەت. هەروەسا كورد ب خۆ ژی نە كوردێن جارانە، ئەو ژی یێن ب بەر پێلێن گوهۆڕینان كەفتین و تا رادەكی یێن هشیار بووین و دزانن ماف و ئازادی و دەولەت ناهێنەدان؛ بەلكو دهێنە ستاندن، لەومانێ یێن سوارێ هەسپێ خەبات و بەرخودانێ بووین و دەستان ژێ بەرنادەن تاكو بدەستڤە بینن. باشوور و رۆژئاڤا نموونەیێن زێندینە كو ئەڤرۆكە یێن بووینە ژیوار و نەحەز و دوژمن بڤێت و نەڤێت پێ دقاییلن و سەرەدەریێ ل گەل دكەن، ها نێزیكە تیرۆژكا ڤانا دێ پەڕێن خۆ ب سەر باكوور و رۆژهەلاتێ دا ژی گریت، ئەو ژی دێ ئازاد و سەرفراز بن و دێ عەورێن گڕگڕی و ستەما داگیركرنێ بۆ حەتا حەتایێ ژ وەلاتێ كوردان دەركەڤن و قەشیێن و دێ كورد هەمی ئازاد ئازاد بن. وەلێ گەلەكا گرنگە كورد دەست ب هندەك چاكسازیێن ناڤخۆ بكەن و پتر خۆ رێكۆپێك بكەن و تفاقێ بكەنە بنگەهێ خۆ یێ سەرەكی بۆ سەركەفتنەكا ئێكجاری، چونكی مالەك ب تفاق بیت جڤاكەك نەشێتێ و جڤاكەكێ ب تفاق بیت مللەتەك نەشێتێ و مللەتەكێ ب تفاق بیت؛ دەولەتەك نەشێتێ، ڤێجا دەستێ هەڤ بگرن و عەورێن رەش و تاری یێن بێ تفاقیێ ل هەمی كوردستانێ رارەڤینن.
