دەمژمێرەکا دی
ژێگر ئەرەدنی
ل بەرامبەر من روینشتی بوو، پرچا وی یا خەلەک وەکی من، لێ چ برینێن کویر ل پاتکا وی نەبوون، ب تنێ ئێک دەمژمێر مابوو ببت خودانێ برینەکا وەسا. ئەو برینا ل پاتکا من دێ بێژی جهێ بڤڕێ راسکولینوکۆفی بوو، لێ چ بڤڕ تێدا نە جکلاندی بوون، کابۆییەکێ سپی و قەمیسەکێ قەیسی ل بەر بوو، هەمان جلکێن من بوون لێ یێن من تژی خوین بوون، پێیەکێ من ب تنێ هەستی بوو، چونکی مابوو د بەر ئاسنێن سەیارێ ڕا، تژی خوین و شکەستن بوو. ل بەرامبەر روینشتمە خار، من گۆتێ: پشتی چل خۆلەکێن دی دێ تەلەفۆنەک بۆ تە هێت، هشیاربە وەکی دینان نەرابی و سەیارێ ب هاژۆی، ئەگەر دێ بیه ئەوێ نوکە ل بەرامبەر تە!
وی ئاگەهـ ژ من نەبوو، یێ مژویلی ب کارئینانا موبایلێ بوو، دوبارە من هەولدا باخڤم و من گۆتێ: پشتی نیڤ دەمژمێرا دی دێ ئەو تەلەفۆن هێت، دێ خویشکا تە یا بچووک بێژیتە تە «بگەهە مال بابۆ مر!». هشیاربی دین نەبی، من نەڤێت ببی «ئەز»، ئەم هەمی دێ مرین، هزرا دەیکا خۆ و خویشکا خۆ بکە، یێ مری، بلەز بچی یان ب دلێ خۆ بابێ مە نازڤریت، هشیاربە تووڕە نەبە و وەکی دینان سەرەدەرییێ نەکە، ئەو دێ مریت ب تنێ تە هندەک کەس یێن هەین بۆ بژی.
دوبارە ئاگەهـ ژ من نەبوو. دەستێن من دەستێ وی نەدگرتن؛ چونکی ئەم ژ دو جیهانێن ژئێک جودا بووین، ئەز هەر ئەو بووم ئەگەر ئەو وێ خەلەتییێ بکەت یا من ژێ ئاگەهداردکر، ئەز هەر ئەو کەسە بووم لێ ب مری. من سەحکر چاڤێن وی یێن کەسک و تژی ژیان، ئەو چاڤێن کێم بوهار دەرباز کرین، ئەو چاڤێن گەلەک مرۆڤان هیڤی یێن خۆ تێدا دچاندن، من دوبارە هیڤی ژێ کرن و گۆتێ: کوڕۆ… «ئەز» «تو» مە، سەحکە خۆ، ئەگەر تو وەبکەی دێ بیە «ئەز» و دێ مری، چ نەما ئەو تەلەفۆن دێ هێت، هیڤی دکەم ژیان یا ل پێشییا تە، هیڤی دکەم من نەڤێت بمرم. بێ مفا بوو، ب چاڤەکێ کەسک من ل دو چاڤێن خۆ یێن کەسەک هیڤی دکرن، وی ئاگەهـ ژ من نەبوو، لێ د وی دەمی دا های ژێ دەنگی تەلەفۆنێ هەبوو، دەما ناڤێ خویشکا خۆ دیتی گڕنژی، پاش گڕنژینا وی هات دزین دەما گوهـ ل گرییا خویشکا خۆ بووی، وێ گۆتێ: بابۆ یێ مری!. بێ هزرا خۆ بکەت دەست هاڤێت سویجێ سەیارێ و وەکی دینان دەرکەفت و چوو!
