دەمێ ئێكەم مەفرەزا پێشمەرگەی هاتیە گوندی، سامیایێ تڤەنگ هاڤێتن و ل تلیلیان دا
ديدار، سالار محةمةد دؤسكى:
ئێك ژ ئەوان ئافرەتێن كوردستانێ یێ خزمەتا پێشمەرگەی كری كو هەر دەم دەرگەهێن مالێن وا بۆ پێشمەرگەیی دڤەكری بوون ، بەحسێ ژیانا وی سەر دەمی یا پێشمەرگەی دكەت، و هەوا ئەنفالان ل دەڤەرا بەهدینان و ژیانا كەلها نزاركێ و بەحركێ.
فەزیلا عەلی، ئێك ژ ئەوان ئافرەتانە یێ رۆلەكێ مەزن دخزمەتكرنا پێشمەرگەیێ كوردستانێ دا هەبوو، ب تایبەت ئەوێن دهاتنە گوندێ وان، د دیدارەكێ دا ل گەل رۆژناما ئەڤرۆ، ناڤبریێ بەحسێ ژیانا وی سەر دەمی دكەت و تایبەت رۆلێ ئافرەتا كورد و گۆت: دەمێ شۆرەشا گولانێ ئێكەم مەفرەزا پێشمەرگەی هاتیە گوندی ئێكێ سورا ل گەل بوو، وی دەمی دگۆتنێ (زۆراب) وی دەمی دەیكا جاسمی (سەمیا) ل مال بوو و صالحی تڤەنگەكا ڤەشارتی هەبوو، و (سەمیایێ) تڤەنگا وی دەرئێخست و ل بەر كەڤری راوستیا و هندەك تڤەنگ هاڤێتن و دەست قوتان و تلیلی ڤەدان، و گەلەك كەیفا مە هات و گازی مە هەمی یا كر و گۆت دەركەڤن، و پێشمەرگە هاتنە گوندی و رۆژا مە هات، وی دەمی خەلكی ژ دل دكر و گەلەك كەیفا مە دهات، و خەلكێ گوندان وی دەمی گەلەك زەحمەت كێشان قوتان و ئەشكەنجەدان و گرتن، و جارەكێ (ئیسفێ خوازی و حەجیێ) تیێ من هەر دو هاتنە دەستەسەركرن.
هەمان ئافرەتێ گۆت: دەمێ پێشمەرگە دهاتە گوندێ مە، هەمی مالان ب گشتی بێ جوداهی گەلەك قەدرێ پێشمەرگەی دگرت، وی دەمی هەمی مالان تەرش و كەوالەكێ باش هەبوو و ژیانا وی سەر دەمی ل سەر خودانكرنا تەرش و كەوالی و چەم و رەزا بوو.
هێشتا گۆت: دەمێ ل مالا بابێ مە مالا مە د خزمەتكرنا پێشمەرگەی دا تەخسیری نەدكر، و دەمێ هشنی من ژیانا هەڤژینیێ ژی پێكئینا بوو و خزمەتا پێشمەرگەی ژی و بێ جوداهی من دكر، و هەر مرۆڤی چ هەبا و چ خوارن لێنابا بوو پێشمەرگە ی ژی هەر ئەو بوو، ژ مالێ و یێ رازیبوو هەر چ خوارن هەبا و هەتا شەڤبێریا خوە ژی دكرن، و گەلەك جاران جانتكێن وان دهاتنە بەرهەفكرن، ئانكو خوارنا رۆژا دووڤدا ژی مە بۆ وانا بەرهەڤ دكر و پاشی خواترا خوە دخواستن و دچوون.
فەزیلا خانێ هەروەسا دبێژیت: دەمێ پێشمەرگە دهاتە گوندی هەلبژێرێ گوندی دا پێشمەرگەی ل سەر مالان بەلاڤ كەن، و ئەگەر مالەكێ زەلام ل مال نەبا چ پێشمەرگە نەدچوونێ یان ئەگەر مالەكا هەژار و دەست كورت با دیسا چ پێشمەرگەی قەستا وێ مالێ نەدكر.
فەزیلایێ گۆتژی: وەی دەمی كاودانێن دارایێن مالا مە دخوش بوون و خەلكی هەمیێ حەز پێشمەرگەی دكر و مرادا گەلەكا بوو بتنێ پێشمەرگەی بینن چونكە هەستا نەتەوەیی گەلەك یا بلند بوو و هەر هەمیا زانی ئەڤە بۆ ئازادكرنا كوردستانێ یێ ژ مال و خێزانا خوە دیركەفتی و ل چول و چیا دنڤیت و بەرهەڤە بهێتە شەهیدكرن، لەوما ژی مالا مە هەر چ تشتێ ب بهابا مە دا پێشمەرگەی و هەر چ خوارنا خوش هەبا دا دەینێ و ئەوژی گەلەك دكەیف خوش بوون ب ئەڤێ چەندێ و زێدەتر دهاتنە هاندان ل سەر رێباز و خەباتا خوە دبەردەوام بن.
فەزیلا عەلی زێوەی، گۆت: نەبتنێ خوارن گەلەك جاران مە ئافرەتا خزمەتا پێشمەرگەی ب گەلەك رەنگێن دی كریە و گەلەك جاران پێلاڤێن وا د دریان مە بۆ چێدكرن یان شیتك نەبا بۆ دهاتە دابینكرن یان هەر پێدڤیەكا ژیانێ با بۆ دهاتە دروستكرن.
هێشتا گۆت: ئافرەتا كورد پتر ماندیبوون دیتی یە ژ پێشمەرگەی، چونكە پێشمەرگە ل چیا بوو و ئەم ئافرەت خودانكرنا زارۆكان و دابینكرنا خوارن و ڤەخوارن و مە كارێ زەلامان ژی دكر و لەما ژی دڤێت رۆلێ ژنا كورد چ جاران نەهێتە ژبیركرن چونكی گەلەك ماندیبوون دیتی یە مە گەنم پاقژ دكر و دستار بوو و باوەركە ئەم چووینە بێرێ ناف پەزی و مە تینا دكرە ماست و هەر ئەو ماست مە دا پێشمەرگەی وی دەمی كەسەكێ چ شیر و ماست و هەمی ئەو شیر مە دكرە روون و ژاژی و پەنیر و هەمی گوند بێ جوداهی دخزمەتا زارۆكێن خوە و پێشمەرگەی دا بوون.
هەمان ئافرەت گۆت: وی دەمی پێشمەرگە خەلكێ گوندی نەبوو و كەسەكێ نەدگۆت ئەڤە مرۆڤێ منە یان نیاسێ مەیە، بتنێ ناڤێ پێشمەرگە یێ دەف مە پیرۆز بوو و هەر دەمێ هاتباینە ئاگەهداركرن كو پێشمەرگە هاتیە گوندی و دێ هەلبژێر ل سەر مالان بەلاڤە كەت ئێك سەر بەرهەڤی بۆ دهاتەكرن و هەر چ خوارنا مرۆڤی هەبا و یا ب قەدر و قیمەت دا بۆ هێتە بەرهەفكرن وی دەمی پێشمەرگەی ژی دگۆتە مە خەبات و خزمەتا هەوە بەرزەنابیت هوون ژی پێشمەرگەنە .
هەروەسا دبێژیت: گەلەك جاران خزمەتا پێشمەرگەی دبوو مەترسی ل سەر ژیانا خەلكێ گوندی و گەلەك جاران لەشكەرێ ئیراقێ داهێت دەردورێن گوندی گریت و دیفچوونێ و لێگەریانێ كەت و دا بێژن پێشمەرگە شڤێدی ل گوندی بوو و هەوە خوارنا دایێ بۆچی هەوە ئەف كارە كریە و گەلەك جاران دهاتینە دەستەسەركرن، بەردەوام حوكمەتا ئیراقێ دهاتە گوندی و دیفچوون كرن لێ شورەشا گولانێ پێشمەرگە گەلەك بهێز كەفت و بەرفرەه بوو ئێدی حوكمەتا ئیراقێ نەشیا بهێتە گوندی بۆ دیفچوونێ و زێدەتر كەیفا خەلكی ژی هات چونكە دەڤەرێن مە پتر ئازادی كەفتێ.
فەزیلایێ دیسا ئاشکراکر: جارەكێ شەهید (تاهر زێوەی) چەند وێنێن خوە ئینابوون مال و ئەو وێنە دپەنجەركا مال دابوون، رۆژا دووڤ دا لەشكرێ ئیراقێ هاتە گوندی و ئەم دەرخستین و بناف مالێن مە كەت و لێگەریانێ و سوپاس بۆ خودێ ئەو وێنە نەدیت و ئەگەر دیتبانە دا گەلەك ئەزیەتا مە هێتەكرن و رۆژا دووڤ دا شەهید (تاهر زێوەی) گۆت: لەشكەرێ ئیراقێ وێنە نەدیت بوون مە گۆتێ نەوالله و سوپاس بۆ خودێ ئەم هاتینە قورتالكرن وی دەمی ترس و لێ ئەم كەیف خوش بووین و بەردەوام بووین ل سەر ژیانا خوە یا رۆژانە و مە پەز دووت و مەشك كر و هەر هەمی كارەكێ گرێدایی ژیانا رۆژانە یا مال و زارۆكێن خوە مەدكر.
هەمان ئافرەتا خزمەتا پێشمەرگەی كری دیارکر و گۆت: ئافرەتا كورد گەلەك ماندیبوون دیت نەبتنێ كاروكوكێ خێزانێ بەلكو دلێ وێ ژی گەلەك پێشمەرگەی بوو و گەلەكا زەلام و كورێن وا پێشمەرگە بوو و هەر دەم چاڤەرێی هاتنا وی بوون وی دەمی زەلام و تیێن من و هەمی پصمام و هەمی پێشمەرگە بوون.
هێشتا گۆت: ل سالا 1988ێ دەمێ ل هەوا ئەنفالان ئەم بیست رۆژ نەبوو من زارۆكەك هەبوو و هەوا ئەنفالان دەست پێكر و ئەم چووینە چیایی و بەرسینگێ من بوو و زارۆكێن دی بابێ وان كربوونە سندوقا دا و هێسترێ كرربوون و هەر من گۆتە زەلامێ خوە دا دەربازبین بچینە تركا و هەمی خەلك دەربازبوو وی گۆت دێ شەری كەین وی زەمی مەنەزانی ئەنفال چیە، ئەم ل بەر كەڤرەكی بووین و زەلامێن مە دناڤا پێشمەرگەی دا بوون و مە دیت هندەك چەكدار هاتن و مە گۆتێ هوون پێشمەرگە نە یان جەحشك؟ ئێك ژوانا گۆت ئەم جەحش كورێن جەحشكاینە و كەر كورێن كەراینە ئەگەر ئەم كورێن جەحشانەباین حالێ تە ئەڤە نەبوو زارۆكەكێ ساڤا د دەستێ تە دا و هەمی زارۆك بچووك، وی دەمی ئافرەتا مرۆڤێن مە بناڤێ(جەمیلا) ئاخفتنێن نە جوان گۆتنە ئەوان چەكدارا هەوە بۆ ئەڤە ئینا سەرێ مە و ئەم 15 رۆژا ماینە ل چیای و ژیان ل وی دەمی یا بزحمەت بوو دا زەلام چن ئاری ئینن و دا كەینە هەڤیر و دناڤا دونی دا توتكا بۆ زارۆكان چێكەین و بڤی رەنگی مە بەردەوامی دا ژیانێ و ئەنفال گەلەك یا نەخوش بوو چەوا مرۆڤان دكرە گری هوسا من بچاڤێن خوە دیت تەرش و كەوالی دكرە گری و روندك ژچاڤێن وا دهاتنە خوار، چارەنڤێسەكێ گەلەك نەخوش بوو چونكە زەلام و مرۆڤێ، مە هەمی پێشمەرگە بوون و دووڤ دا لێبورینەك دوژمنی دا و مە خوە رادەست كر و ئەم ب ترۆمبێلێن لەشكەری ئیناینە كەلها نزاركێ و دووڤ دا بۆ بەحركێ هاتینە رەوانەكرن و ژیان ل بەحركێ ب رەنگەكێ دی بوو، ب نان و ئاڤ و خوارن و خەلكێ هەولێرێ بۆ بەهدینان گەلەك كر و دڤێـ چ جاران رۆلێ وی خەلكی نەهێتە ژبیركرن.
ل دووماهیێ، فەزیلا عەلی گۆت: گرنگە رۆلێ ئەڤان ئافرەتێن خەبات و خزمەتا پێشمەرگەی كری نەهێـە ژبیركرن، چونكە رۆلێ وان گەلەكێ پیرۆز بوویە،ل هەر دو شورەشێن ئیلون و گولانێ مە گەلەك خزمەتكریە نان دایە.
