دەمێ فەوجا گەلیێ زاخۆ هاتیە ستاندن هەتا 30 پێشمەرگەیان ل گەل هێزا عەلی هالۆ دبێ چەك بوون
زاخۆ، سالار محەمەد دۆسكی:
پێشمەرگێ شورەشێن ئیلون و گولانێ (عومەر عەلی هالو) ژ دایك بوویێ سالا 1949 ل باژێرێ زاخۆ یە، ل سالا 1962 ل شەرێ (باتیفا) دژی حوكمەتا وی سەردەمی یا ئیراقێ ل گەل بابێ خوە بوویە پێشمەرگە و چەكێ شەرەفێ هەلگرتیە و چەندین شەر و داستانان ل گەل بابێ خوە پشكدار بوویە، دیسا ل شورەشا گولانێ بەردەوامی دایە خەباتا خوە و پشكداری سەرهلدانا سالا 1991 بوویە و هەتا شەرێ دژتی تیرۆرستێن داعش پشكدار بوویە، بەردەوامە هەتا نوكە.
پێشمەرگێ شورەشا ئیلون و گولانێ (عومەر عەلی هالو) د دیدارەكێ دا ل گەل رۆژناما ئەڤرۆ گۆت: ل ژیێ (13) سالیێ ئانكو ل سالا 1962 بۆ جارا ئێكێ من چەكێ هەلگرتی و بوویمە پێشمەرگە ل گەل بابێ خوە و ئێكەم شەرێ پشكداربوویم شەرێ (باتیفا) بوویە، پشتی ل سالا 1968 بابێ من (عەلی هالو) شەهید بووی ل جهێ وی من پوستێ ئامر بەتەلیون وەرگرت.
پێشمەرگێ شورەشێن ئیلون و گولانێ (عومەر عەلی هالو) زێدەتر بەحسێ شەرێ (باتیفا) كر و گۆت: ل سالا 1962 جارەكێ فەوجەكا لەشكەرێ ئیراقێ هاتە (باتیفا) ئەو فەوج ئاسێ بوو و ناڤێ ئامرێ وێ فەوجێ (مەجید سەبعاوی) بوو و حوكمەتا ئیراقێ گەلەك بزاڤكرن بهێنە دەڤەرێ، ل گوندێ (ئاڤ گونلیێ) ژ بەر پێشمەرگەی نەشیان دەربازبن و حوكمەتا ئیراقێ نەچاربوو ب فرۆكان خوارن و ڤە خوارن بۆ فەوجا (باتیفا) ڤە دگوهاستن، رۆژەكێ (مەجید سەبعاوی) كەفتە بەرا لەشكەری ب بهانا وێ چەندێ كو دێ رێكێ ڤەكەت ل (بانا دەحلی) ل (باتیفێ) هاتە كوشتن و نەشیا دەربازبیت و لەشكەری هەمی بزاڤكرن كو كەلەخێ وی ژ دەستێ پێشمەرگەی وەربگرن نەشیان و لەشكەرێ وی دكەفتنە سەر زكی و دهاتن و كنف دهاڤێتـە پێ وی و هەمی بزاڤكرن كو كەلەخێ وی بكێشن پێشمەرگەی نەدهێلا و دووف دا (عەلی هالو) فەرمان دا و گۆت بلا وی كەلەخی بەن و مە نەڤێت چەند پێشمەرگە بۆ كەلەخەكی شەهید بن و ئەڤی شەری پتر ژ (30) رۆژان ڤە كێشا و دووف دا حوكمەت نەچار بوو هێزەكا مەزن ئینا و رێك ڤەكر و فەوجا (باتیفێ) هاتە ڤەكێشان.
پێشمەرگێ شورەشێن ئیلون و گولانێ (عومەر عەلی هالو) گۆتژی: ل سالا 1963 ل گەل بابێ خوە شەهید (عەلی هالو) بووم ل شەرێ چیایێ (مەتینی) ل سالا 1963 حوكمەتا ئیراقێ ب لەشكەرەكێ هەرە باش و مەزن ڤە ل گەل جاشا ژ بامەرنێ بەرەف چیایێ( مەتینی) هاتن و ب سەر چیایی كەفتن وی دەمی بابێ من (عەلی هالو) یێ نەخوش بوو ل مال بوو، (ئەسعەد خوشەبی، عیسێ سوار) ل شەری بوون وی دەمی ئەوان هەر دوكان كاغەزەك بۆ بابێ من هنارت و بەحسێ شەرێ (مەیتنی) كر و دوێ كاغەزێ دا ژ خواستن ل گەل هەژمارەكا مرۆڤێن خوە پشكداریێ دشەرێ (مەتینی) دا بكەت و بیرا من دهێت وی دەمی بابێ منێ نەخوش بوو و داخاز ژ من كر چەند مرۆڤێن مە ئەوێن وی دەست نیشانكری ئاگەهدار بكەم كو سوباهی سپێدێ خوە بەرهەف بكەن و دێ پشكداریێ دشەرێ چیایێ (مەیتنی) بن، پصمامەكێ بابێ من ل مالا مە بوو و گۆتێ تویێ نەخوشی دناڤا جهان دا دێ كیڤە چی؟ بابێ من گۆت دێ چم بەرەڤانیێ ژ ئەڤی مللەتی كەم و دێ ساخ بم و بابێ من گۆت هێسترەكێ بوومە بەرهەف كەن و خواست ل مال بم بەلێ من گۆتێ دێ ل گەل هەوە هێم و ئەم چووینە (بێگوڤا) و بیرا من دهێت ئەم كرینە قازانێ دا و ئەم ژ رویبارێ خابیری دەربازكرین و ئەم چووینە (نیسكا) وی دەمی بارەگایێ پێشمەرگەی ل وێرێ بوو بیرا من دهێت جاشەكێ دەستەسەركری بوو و دەست و پێن وی دگرێدایی بوون ل بن چنارەكێ و ئەم چووینە (دەرگەلێ) مە هندەك پێشمەرگە دیتن و دەڤەر هاتبوو بەردان وی دەمی بابێ من پرسیارا (عیسێ سوار)كر و كەسەكی گۆتێ ل پشت بەرەكی یە، پشتی ئەم گەهشتینە دەف مە دیت خوینا ب جلكێن وی ڤە و گەلەك یێ زەعیف و لاواز بوو و بابێ من گۆتێ تە خێرە گۆتێ ما تونابی قیامەتا خودێ یا ل سەر سەرێ مە و گۆتێ پا ئەم چ بكەین و گۆتێ ئەم دێ چینە (شێلازا) (هاشم مێروزی و ئەحمەدێ حەجی محێ) هەر دو ل (شێلازا) بوون و گۆتێ هەرنە سەرێ چیایی و ب هاڤێنە حوكمەتێ بەلكی پیچەكێ ئەف شەرە ل سەر سەرێ مە سڤك بیت، (عەلی هالو) گۆت زحمەتە حوكمەتێ هەمی جه گرتینە بەلێ پا كەیفا تەیە و ئەم دێ چینە دەڤەرێ و ئەم ب شەف چووینە (شێلازا) بابێ من گازی كرە موختاری و گۆتێ وەرە ئەڤان پێشمەرگان بەلاڤە بكە و ئەم دێ ل مزگەفتێ نڤین و گۆتە موختاری بوومە دو رێبەران بەرهەف بكە چونكە ئەم دێ ب سەر چیایی كەڤین و دەمێ رێبەر بەرهەفكرین و مە دیت دەمژمێر دوازدە دو پێشمەرگە هاتن و داخازا دیتنا بابێ من كر و كاغەزەك ژ دەف (عیسێ سوار) ئینا بوو و بابێ من گۆتە من ڤێ نامێ بخوینە و د نامێ دا (عیسێ سوار) گۆت توپەك دناڤا پێشمەرگەی كەفتیە و كورێ من (محەمەد) ل گەل پێنچ زێرەڤانێن من شەهید بووینە و (عیسێ) خواست بوو كو ئەف شەڤە ب سەر چیایی بكەڤین و چیا گەلەكێ ئاسێ بوو و رێبەرێن مە نە دشارەزا بوون و ئەم خەلەتكرین و هەتا ب سەر چیایی كەفتین بۆ سپێدە و ئەم ل گەل (هاشم مێروزی و ئەحمەدێ حەجی محێ لیناڤایی دۆسكی) ب سەر ئێك هەلبووین و بابێ من گۆتێ رابن و ئەوا گوتێ بهێنا خوە بدە بابێ من گۆتێ نە وەختێ روینشتنێ یە و دڤێت ئەم بچین ب هاڤێژینە حوكمەتێ و ل سەرێ چیایی مە هاڤێتە حوكمەتێ و حوكمەت نەهاتە سەرێ چیایی و بابێ من ل هنداف (شێلازا) تەماشەی دەڤەرێ كر و گۆت بابو دێ كاغەزەكێ نڤیسم و دێ رابی چیە مال و دێ وێ كاغەزێ بەی دا پێشمەرگێ من بهێت و گۆت ئەف شەرە دێ ڤە كێشیت و باشترە بچیە مال و ئەگەر ئەز بچم ژی چ ئاریشە نینە بەلێ دڤێت تو بچیە مال و چاڤێ تە دا ل مال بیت و دو پێشمەرگە دانە ل گەل من و ئەم چووین و هەتا مە پێشمەرگە ئاگەهداركرین.
