دەمێ مەرەقا مرۆڤی دگەهیتە گۆپیتكا خۆشیان داهێنان سەرهەلددەت
دلۆڤان هالۆ:
هونەرمەندێ شێوەكار(كەلحێ نعمەت سلێڤانەیی) د دیدارەكێ دا بۆ رۆژنامەیا ئەڤرۆ گۆت: دەمێ ئەز قوتابی ل پولا شەشێ سەرەتای حەزا هونەرێ باشنڤیسیێ و نیگاركێشی ل دەف من هەبوو، لەورا ل دووف زانینا خوە من رۆژانە هندەك كەڤال چێدكرن و ل سەر دیوارێن مالێ و ئاڤاهیان وێنە چێدكرن و بۆ من گەلەكا خۆش بوو.
هەروەسا گۆت: هونەرێ شێوەكاری ل دەف من مەرەق و داهێنانە، چنكو ب رێیا بكارئینانا رەنگ و فرچێن خوە كەڤالێن سادە و سپی یێن سەر كانفانسی و پارچە پەرۆكێ ئێش و ژان و خۆشی و نەخۆشی و جوانی یێن كوردستانێ پێ دنەخشینم و ئەڤ جۆرە هونەرە بوویە ئێك ژ رێیێن هزر و بیر و حەزژێكرن و دانوستاندنا مرۆڤی دژیانێ دا، هەروەسا بوویە پرتووكەكا سروشتی یا مەزن و هەر كەسەك ژمە دشێت ب هەست و وژدانا خوە ببینیت و ل دەمێ مەرەقا مرۆڤی دگەهیتە گۆپیتكا خۆشیان داهێنان سەرهەلددەت و كارێن جوان دهێنە چێكرن و بەردەوام ئەز دبێژم شێوەكارێ سەركەفتی ئەوە یێ كو بەردەوام بۆ خەلك و حەزژێكەرین شێوەكاری بەرچاڤ بكەت، هەروەسا یێ بەردەوام بیت ل سەر چێكرنا كەڤالان و هەر خوە نێزیكی رەنگان بكەت .