دەمێ بەحسی شوینوارێن گەلیێ خنس دكەم هەروەكی بەحسێ جهەكی ل فرەنسا دكەم!
نێچیرڤان حەسەن گەڤەركی
شوینوار ئەو پرە یاكو ژیانا مە یا نوكە ب سەردەمێن كەڤن ڤە گرێددەت، ژ هەمی ئالیەكی ڤە گرنگیا خۆ هەیە، لەوما زانین و ڤەكۆلین ل سەر شوینواران یا فەر و پێدڤیە؛ ژبەركو ب رێیا تێگەهشتنا شوینوارا دێ ب سەر شێوازێ ژین و ژیارا كەڤنا مرۆڤایەتیێ هەلبین ژ هەمی رویەكی ڤە، دیسا هاریكارە بۆ زانینا ناسنامەیا گەلان و شەنگستەكێ موكمە بۆ پەیدابوونا هێزا ئابۆری د ناڤ مللەتان دا. شانازیە كو وەلاتێ مە ژی جهێ خۆ ل سەر نەخشێ جیهانی یێ شوینواری كریە و ناڤەند و زانكۆیێن جیهانی گرنگیێ پێ دەن و ڤەكۆلینان ل سەر دكەن،ئەڤە ژی رێكەكا گرنگە بۆ ناسینا ناسنامەیا مللەتێ مە. یا خۆیایە كو ل ڤێ دوماهیێ پڕانیا شوینوارێن كوردستانێ كەفتینە د ناڤ پرۆگرامێن خواندنێ دا و ل قۆناغێن جودا جودا یێن خواندنێ دهێنە خواندن؛ بگرە ژ قۆناغێن دەسپێكی تاكو زانكۆیێ، ئەڤ چەندە ژی جهێ دەستخۆشیێ یە بۆ وەزارەتا پەروەردێ، لێ ئاشنابوونا قوتابیان بۆ ڤان شوینواران بتنێ ب رەنگەكێ تیۆری یە؛ بێ كو راستیا هەبوونا ڤان شوینواران ب چاڤ ببینن، بۆ نموونە دیارترین شوینوارێن ئاشۆریان ل گەلیێ (خنس) هەنە ل قەزا شێخان كارەكێ ب زەحمەت نینە كو سالانە ب تنێ بۆ جارەكێ ژی بیت قوتابیێن مە سەرەدانا ڤی جهی بكەن، ل گەلیێ (خنس) تێكستەكی نڤیسینا بزماری هەیە كو ئێك ژ كەڤنترین نڤێسینایە ل جیهانێ؛ تێدا بەحسی پرۆژەیێ پاشایێ ئاشۆری (سەنحاریب) دكەت كو چاوا ئاڤ ل (خنس) بریە پایتەختێ خۆ ل (نەینەوا)، هەروەسا هەبوونا پەیكەرێ گایێ بالدار (ثورالمجنح) ل جهێ ناڤبری كو ئێك ژ ناڤودەنگترین پەیكەرێن شوینوارنە ل جیهانێ، رەنگە ل مۆزەخانەیین جیهانێ خەلك پارەكێ زۆر بدەت؛ تاكو ببینن بەلێ دبیت قوتابیێن مە ب رەخ ڤە بن و حەتا نوكە نەدیتینە! یان شوینوارێن شكەفتا هەلامەتان و شوینوارێن زەرەدەشتیان ل گەلیێ دهۆكێ كو رەنگە دیتنا وان گەلەكا ب ساناهی بیت و چ ئەرك و تێچوونەكا مەزن ژی پێنەڤێت. هەروەكی ل سەر هزرا گۆتنەكا مە یا كوردەواری كو دبێژیت (ئەڤە هرچە یێ ل دەوسێ دگەڕن)، مادەم ئەم هرچێ ب خۆ ببینین بۆچی دێ بەس ل دەوسێ گەرین!؟
دەمێ ئەز وەكو مامۆستایێ مێژوویێ؛ بۆ نموونە دەمێ بەحسێ شوینوارێن گەلیێ (خنس) بۆ قوتابیان دكەم یان شوینوارێن شكەفتا (هەلامەتا)، هەروەكی بەحسێ جهەكێ شوینواری ل فرەنسا دكەم! ئەڤە ژی ڤەدگەریێت بۆ نەبوونا گەشتێن زانستی، چاوا سالانە ل گشت ناڤەندێن خواندنێ گوهۆرین دروست دبن و وەزارەتا پەروەردێ بەردەوام دید و بابەت و هزێن جودا جودا دئێخیتە ناڤ سیستەمێ خواندنێ دا و گرنگیەكا مەزن ب ڤێ ئێكێ ددەت، وەسا یا فەر و گرنگە دەرفەتێ برەخسینن بۆ قوتابخانەیان سەرەدانا جهێن شوینواری بكەن، دێ چەند باشتر و گاریگەرتر بیت؛ دەمێ قوتابی وێنە و تێكستێن خەتێ بزماری ب چاڤ و دەست لێخستی ببینیت، هەروەكی فەیلەسۆفێ هندی (ئوشۆ) دبێژیت (دەمێ دخوینم فێردبم دەمێ دبینم تێدگەهم)، بێگومان ئەڤە ژی راستەوخۆ یا گرێدایە ب گەشتێن زانستی ڤە بۆ قوتابیان و پێدڤیە وەزارەتا پەروەردێ گرنگیێ بدەتە ڤێ چەندێ، داكو هوشیاریا جڤاكێ مە بەرانبەر كەلتور و شارستانیەتا مە زێدەتر لێبێت ل پاشەرۆژێ بهێنە پاراستن هەروسا گرێدانا قوتابیان ب ئاخ و وەلاتی ڤە موكمتر لێبێت؛ دیسا تێگەهشتنا سەردەمێن بۆری ب رێكا شوینواران هاریكارە بۆ ئاڤاكرنا پاشەرۆژەكا ب هێز و زانینا وان گوهۆرینێن سیاسی و ئابۆری و جڤاكی رویداین ل سەردەمێن دیرۆكی یێن جودا جودا.
