دەمێ مرۆڤی وەلات نەبیت ھونەرێ وی ژی پەنابەرە
ئەڤرۆ نیوز:
سترانبێژا گەنج نارین شێخی، د دیدارەکێ دا بۆ ئەڤرۆ گۆت: ب حەزا خوە من دەست ب سترانگۆتنێ کریە، و ھەتا نوکە من حەفت کلیپ ھەنە، بۆ دەمێ بھێت ژی ھندەک سترانێن نوو ل بەردەستن، لێ وەک ئەلبۆم ھەتا نوکە من چو ئەلبۆم نینن، لێ ھیڤیا من ئەوە ل داھاتی بشێم ئەلبۆمەکا باش چێکەم.
نارینێ گۆت: ئەڤە چەند سالە ئەز ل ئەلمانیا دژیم و کارێن ھونەری دکەم و ھیڤیێن من دوارێ ھونەری گەلەکن، بەلێ دەمێ مرۆڤ ل غەربیێ بژیت ئەو ھیڤی دبنە خەون و خەیال، چونکو ئەزژ وەلاتێ خوە و وان کەسێن ئەز حەزژێ دکەم دوورم و غەریبم و بەردەوام ھزرێن وان دکەم، و ئەز گەلەک عاجز دبم دەمێ سترانبێژەک سترانەکێ دبێژیت و تێک ددەت، و ئاستەنگا مەزن ل پێشیا ھونەری َمن ئەوە بێ وەلات بوونە و دەمێ مرۆڤی وەلات نەبیت ھونەرێ وی ژی پەنابەرە.
ل دووماھیێ گۆت: دەزگەھێن مە یێن ھونەری ھاریکاریا مە ناکەن و ھەموو تشت ل دەف وان ب رێیا خال و خارزاتییێ و مرۆڤاتیێ دھێنە ئەنجام دان و ئەم گەلەک پێ دئێشین.