دەم پارتی داخـواز دکـەت کو پەرلـەمانێ تورکـیا ب ئەرکـێ خـوە رابیت
سەرۆکێ پەرلەمانێ تورکیا پشتی کۆمبوونا ل گەل هەڤسەرۆکێن دەم پارتی دیار کر نها پتر ژ هەر دەمەکێ پێدڤیا تورکیا ب ئاشتیێ یا هەی و دڤێت هەموو پرس ل پەرلەمانی بهێنە چارەسەرکرن و دەم پارتی ژی داخواز کر پەرلەمانێ تورکیا ب ئەرکێ خوە رابیت.
نومان کورتولمیش سەرۆکێ پەرلەمانێ تورکیا دوهی سەرەدانا دەم پارتی کر و ل گەل هەڤسەرۆکێن وێ پارتێ کۆمبوو و پشتی کۆمبوونێ ژی سەرۆکێ پەرلەمانێ تورکیا دیار کر، تورکیا کەفتیە قووناغەکا گەلەک گرنگ و دیرۆکی، هەموو هێزێن سیاسی ژی پشتەڤانیێ ل تورکیایەک بێ تیرۆر دکەن، ئەو یەک ژی گەلەک گرنگە و نها وەکو پەرلەمانێ تورکیا ئەو کار دکەن دا پرسێن هەی ل پەرلەمانی چارەسەر بکەن و گۆت: (مە دڤێت هەموو هێزێن سیاسی یێن تورکیا ب تایبەتی ژی فراکسیۆنێن ل پەرلەمانی پشتەڤانیێ ل چارەسەرکرنا پرسێن نها ل تورکیا بکەن، چونکی قووناغا ئاشتیێ گەلەک یا گرنگە و داخوازیا هەموو وەلاتیێن تورکیا یە، گرنگە هەموو هێزێن سیاسی ژی د ئاڤاکرنا کۆمسیۆنەکێ دا بۆ پێشڤەبرنا قووناغا ئاشتیێ جه بگرن).
ل ئالیێ دی تونجەر باکرهان هەڤسەرۆکێ دەم پارتی ژی دیار کر، هەتا نها ژ ئالیێ دەولەتا تورکیا ڤە ب کریاری چو نەهاتیە کرن، گەلێ کورد ل تورکیا چاڤەرێی پێنگاڤێن نوو یە و ب تایبەتی ژی د رەوشا نها دا دڤێت هندەک کار بهێنە کرن و گۆت: (بێگومان دڤێت پەرلەمان ب ئەرکێ خوە رابیت، دڤێت هندەک چاکسازی بهێنە کرن و بابەتێ زمانێ کوردی، گرتیێن سیاسی و نەهێلانا سیاسەتا قەیوومان ژی ژ داخوازیێن سەرەکی یێن دەم پارتی و گەلێ کوردە، ژ بەر ڤێ یەکێ ژی ئەم هیڤیدارین د دەمەکێ نێزیک دا ب کریاری هندەک تشت بهێنە کرن، ب تایبەتی ژی دڤێت پەرلەمان پتر ب رۆلێ خوە رابیت و گرنگە پەرلەمانێ تورکیا ببیتە ناڤەندا چارەسەرکرنا پرسا کوردی، لێ د هەمان دەمی دا دڤێت ژ ئالیێ حوکمەتێ ڤە ژی هندەک پێنگاڤێن بلەز بهێنە ئاڤێتن).
ل ئالیێ دی دوهی ئەحمەد تورک سیاسەتمەدارێ ناڤدار یێ کورد ل تورکیا ژی دیار کر، هەتا نها ژ ئالیێ دەولەتا تورکیا ڤە پێنگاڤێن پێدڤی نەهاتینە ئاڤێتن، دڤێت ژ بۆ پێشڤەبرنا قووناغا ئاشتیێ هندەک تشتێن بەرچاڤ بهێنە کرن، دەولەت گەلەک درەنگ بزاڤان دکەت، ئەو یەک ژی بوویە جهێ دلگرانیا کوردان ل تورکیا و گۆت: (لێ ئەم هیڤیدارین کو قووناغا ئاشتیێ بگەهیتە ئەنجامەکێ باش، مە دڤێت ئێدی پرسا کوردی ل تورکیا بهێتە چارەسەرکرن و دووماهی ب شەڕێ چەندین سالان بهێت، ژ بەر ڤێ یەکێ ژی ئەم چاڤەرێ نە د رۆژێن پێشیا مە دا هندەک تشت بهێنە کرن کو ببنە ئەگەرێ دلخوەشیا کوردان ل تورکیا).
