دەم پارتی: پێدڤیە تورکیا دەست ب چاکسازیێن قانوونی و سیاسی بکەت
دەستهەلاتا تورکیا و هێزێن ئۆپۆزسیۆنێ و پارتێن کوردی ل تورکیا پێشوازیێ ل سازکرنا کۆنگرەیێ پەکەکێ دکەن و داخواز دکەن پەکەکە ب تەمامی دەست ژ چەکی بەردەت و دەم پارتی ژی دیار دکەت دڤێت تورکیا دەست ب چاکسازیێن سیاسی و قانوونی بکەت.
پارتا کرێکارێن کوردستانێ راگەهاند کو وان ل رۆژێن ٥ و ٧ گۆلانێ کۆنگرەیێ خوە یێ ١٢ ساز کرینە و ل سەر بنەمایێ بانگەوازیا رێبەرێ خوە عەبدوللا ئۆجەلانی بریارێن گرنگ داینە و دێ د دەمەکێ نێزیک دا بریارێن کۆنگرەی بۆ رایا گشتی ئاشکرا کەن.
دەم پارتی ژی راگەهاند کو سازکرنا کۆنگرەیێ پەکەکێ دهێتە رامانا دەستپێکرنا قۆناغەکا نوو و دیرۆکی ل تورکیا، دڤێت ئێدی چەک نەمینن و ل هەمبەر دا ژی بێگومان دڤێت دەستهەلاتا تورکیا دەست ب قۆناغەکا نوو بکەت، دڤێت گوهۆڕینێن قانوونی و سیاسی ل تورکیا بهێنە کرن و هەروەسا دڤێت مەرجێن ئۆجەلانی ژی بهێنە باشکرن دا ئەو بشێت پتر ب رۆلێ خوە رابیت و کار بۆ چارەسەرکرنا پرسا کوردی ل تورکیا بکەت.
پەروین بولدان ئەنداما شاندێ ئیمرالیێ ژی دیار کر، ئەو وەسا دبینیت کو ئۆجەلان ب رێیا تەلەفۆنێ پشکداری د کۆنگرەیێ پەکەکێ دا کریە و دبیت پشتی دەمەکێ سەرۆک کۆمارێ تورکیا ژی داخویانیەکێ بدەت، لێ یا گرنگ ئەوە نها قۆناغەکا نوو و دیرۆکی ل تورکیا دەستپێکریە و دڤێت دەولەت ژی ب ئەرکێ خوە رابیت، دڤێت گرتیێن سیاسی ب تایبەتی ژی یێن نەخوەش هەر زوو بهێنە ئازاد کرن، هەروەسا گرنگە دەست ب چاکسازیێن سیاسی و قانوونی ل تورکیا بهێنە کرن، هەکە ئەو یەک بهێتە کرن دێ رێ بۆ چارەسەرکرنا پرسا کوردی خوەش بیت، دڤێت ئێدی ل تورکیا شەڕ نەمینیت و هەموو پرسێن هەی ژی ب رێیا دانوستاندنان بهێنە چارەسەرکرن.
ئورهان میرئۆغلۆ ئەندامێ بەرێ یێ سەرکردایەتیا ئاکپارتیێ ژی دیار کر، بریارا سازکرنا کۆنگرەیێ پەکەکێ براستی ژی گەلەک گرنگە، ب سالانە مە دڤێت شەڕ نەمینیت دا قۆناغەکا نوو ل تورکیا دەستپێ بکەت، چونکی ب سالانا ئەم دبێژین پرسا کوردی ب شەڕی و توندوتیژیێ ناهێتە چارەسەرکرن و دڤێت پەکەکە دەست ژ چەکی بەردەت.
گەلەک هێز و ئالیێن دی یێن سیاسی ل تورکیا ژی پێشوازی ل بریارا سازکرنا کۆنگرەیێ ١٢ یێ پەکەکێ کرن و هیڤی خواستن پەکەکە ب فەرمی خوە هلوەشینیت و دەست ژ چەکی ژی بەردەت و ل هەمبەر دا داخواز ژ دەولەتا تورکیا ژی کرن دەست ب چاکسازیێن سیاسی و قانوونی ل تورکیا بهێتە کرن، هەروەسا داخواز کرن کو دەولەتا تورکیا گرتیێن سیاسی ئازاد بکەت و دەست ژ سیاسەتا قەیوومان بەردەت و چو ئاستەنگان ژی ل هەمبەر خەباتا سیاسی یا گەلێ کورد دروست نەکەت.
