دەم یێ هاتی ئسرائیل و فەلەستینی دەست ب قۆناغەکا نوو بکەن
ب، سه‌رجان مەحمود:
دێیڤید ساترفیلد نوونه‌رێ تایبه‌ت یێ ئه‌مریکا ل رۆژهه‌لاتا ناڤین، د داخۆیانیه‌کا رۆژنامه‌ڤانی دا راگه‌هاند کو ئه‌و ژ نێزیکڤه دووڤچووونا شه‌رێ ل غەزەیێ دکەن و گۆت: (پشتی ئێرشا حه‌ماسێ ل غەزه‌یێ ره‌وش گه‌له‌ک خراب بوویه و دڤێت ئالیێ ئسرائیلێ د شه‌رێ ل غەزه‌یێ دا گرنگیێ بده‌ته پاراستنا ژیانا وه‌لاتیێن سڤیل و ب تایبه‌ت ژی ره‌وشا زارۆیان و ژیانا وان نه‌ئێخیته ژێر مه‌ترسیێ. ئه‌م ناخوازین دیمه‌نێن کوشتنا زارۆیان و وه‌لاتیێن سڤیل ل غەزه‌یێ ببینین.)
نوونه‌رێ ئه‌مریکا هه‌روه‌سا راگه‌هاند ژی کو غەزە پشکه‌که ژ فه‌له‌ستینێ و پشتی شه‌ر ب دووماهی بهێت ژی دێ خه‌لک ڤه‌گه‌ریتە ڤە وارێ خوه و گۆت: (گه‌له‌ک ئاشکرا دبێژم غەزە ژی وه‌ک شه‌ریعا رۆژئاڤا پشکه‌که ژ فه‌له‌ستینێ و کۆچبه‌رکرنا ئاکنجیێن فه‌لەستینێ ژ غەزەیێ د رۆژه‌ڤێ دا نینە و دڤێت خه‌لکێ فه‌له‌ستینێ ڤه‌گه‌رنە ڤە ده‌ڤه‌رێن خوه).
نوونه‌رێ ئه‌مریکا ل رۆژهه‌لاتا ناڤین د دووماهیا ئاخڤتنا خوه دا ژی راگه‌هاند کو چارەسەریا هه‌ری گونجایی بۆ پرسا فه‌له‌ستینێ راگه‌هاندنا دو ده‌وله‌تێن سه‌ربخوه یه و گۆت: (ئه‌م وه‌سا دبینین کو ده‌مێ ڤێ یه‌کێ هاتیه پرسا فه‌له‌ستینێ ب دیالۆگێ بهێته چارەسەر‌کرن. چارەسەریا راست و دروست ژی راگه‌هاندنا ده‌وله‌ته‌کا سه‌ربخوه یا فه‌له‌ستینێ یه و ل هه‌رێمێ هه‌تا فه‌له‌ستین و ئسرائیل هه‌ڤدو ب فه‌رمی ناس نه‌کەن پرس ژی چاره‌سه‌ر نابن، بۆ ڤێ چه‌ندێ ئه‌م ل گه‌ل ڤێ یه‌کێ نه کو ئسرائیل ده‌وله‌تا سه‌ربخوه یا فه‌له‌ستینێ ب فەرمی ناس بکه‌ت و ب هه‌مان ره‌نگی ئالیێ فه‌له‌ستینێ ژی ده‌وله‌تا ئسرائیلێ ب فه‌رمی ناس بکه‌ت).
ناڤهاتی ئەو یەک ژی دیار کر، ژ بۆ ڤێ یەکێ دڤێت هەر دو ئالی دەست ب قۆناغەکا نوو بکەن، چونکی شەر چارەسەر نینە، دڤێت ئسرائیل و فەلەستین ڤێ راستیێ باش بزانن، ژ بەر ڤێ یەکێ ژی ژ بلی راگەهاندنا دو دەولەتێن سەربخوە چو رێیەکا دی بۆ چارەسەرکرنا قەیرانا نها یا د ناڤبەرا ئسرائیلێ و فەلەستینێ دا نینە، ئەم داخواز دکەین هەر دو ئالی ل سەر ڤێ بنەمایێ دەست ب قۆناغەکا نوو بکەن، بێگومان دڤێت هەموو وەلاتێن رۆژهەلاتا ناڤین و وەلاتێن دی یێن جیهانێ ژی بۆ رێگریکرن ژ روودانا کارەساتا نها ل غەزە هاریکار بن، چونکی وەکو دی ئاریشە و شەر دێ بەردەوام بیت و ئاشکرایە ئەو یەک د بەرژەوەندیا چو ئالیەکێ دا نینە.
