دەنگبێژ شاکرۆی کاریگەری ل سەر هونەرمەند ئۆزجان دەنیزی هەبوویە
ئۆزجان دەنیز
بۆ ئێکەم جارە هونەرمەندێ بناڤ و دەنگ یێ وەلاتێ تورکیا ئۆزجان دەنیز د دیدارەکێ دا بەحسێ مامێ خوە دەنگبێژێ کورد شاکرۆ بکەت و بێژیت کا چەند کاریگەری ل سەر وی هەبوویە وەکو هونەرمەند و کا چ میراتەکێ هونەری بۆ وی ل پشت خوە هێلایە و ب چ شێوە سترانێن خوە تۆمارکرینە.
هونەرمەندێ بناڤ و دەنگ یێ وەلاتێ تورکیا ئۆزجان دەنیز ل دووماهی دیدارا خوە یا هونەری دا ل بەرنامێ ئەی بی تالك دا گۆتە پێشکێشکارێ بەرنامەی دەنگبێژێ کورد شاکرۆ مامێ منە، پێشکێشکاری پسیار ژێ کر و گۆتێ مامێ تە یێ دەنگبێژ شاکرۆ چەند کاریگەری ل سەر تە هەبوویە وەکو هونەرمەند؟ هونەرمەند ئۆزجان دەنیزی ژی د بەرسڤا خوە دا گۆت:»مامێ من دەنگبێژێ کورد شاکڕۆ دەنگەکێ گەلەك خۆش هەبوو، ئەگەر دەرفەتا تە کەفتێ گوهداریا وی بکە دێ زانی چەند خودان دەنگەکێ خۆش و جهێ سەرسۆرمانێ بوویە، مامێ من شاکرۆ ل جیهانێ هەموویێ ناسیارە».
ئۆزجانی گۆت ژی:»جارەکێ ل وەلاتێ کەنەدا من مۆزیکژەنەکێ مەزن و زیرەك نیاسی بناڤێ هۆیماژ کو د زۆربەیا فلمێن هۆلیود دا کەمانچە ژەنییە و مۆزیکژەنەکێ گەلەك گرنگە ل وی وەلاتی، مە ل ڤێرێ پێکڤە پڕۆژەیەك هەبوو، ل دەمێ کو ل ڤێرێ من و وی مۆزیکژەنی ئێکدوو نیاسیە، بەردەوام د گوتە من دەنگێ تە یێ خۆش دەنگێ هونەرمەندەکێ دئینیتە بیرا من، و جارەکێ ژ نشکەکێ ڤە بەرەڤ تڕۆمبێلا خوە چوو و هندەك سیدی ژێ ئینانە دەر و ئینان و ئێك ژێ هەلبژارت و نیشا من دا و گۆت ئها دەنگێ تە وەکو یێ ڤی هونەرمەندی یە، من ژی گۆتێ ئەو دەنگبێژ شاکرۆیە و مامێ منە».
ئۆزجان د بەردەوامیا بەرسڤا خوە دا دبێژیت:»ل وی دەمی ستۆدیو نەبوون لەوما مامێ من هیچ تۆمارەکا دەنگی یا ستۆدیویێ نەبوویە، بەلکو هەردەم د ڕۆنشتە خوارێ و دەستەکێ خۆ ددانا بەر گۆهێ خۆ و کلام د گۆتن و ب مسەجلێ و کاسێتێ دەنگ تۆمار دکرن، سترانێن خوە هەموو ب ڤی شێوەیی تۆمار دکرن، و هەر ب ڤی شێوەیی دەنگێ وی گەهشتە هەموو جهان».
زێدەتر گۆت ژی:»ل دەمێ کو ئەز چوویمە وەلاتێ ئەمریکا ژی، ل گەلەك جهان من گۆهـ ل ستران و دەنگێ مامێ خوە شاکرۆ دبوو، چونکی گەلەك ژ هونەرمەندێن ڕاپەر ل ئەمریکا دەنگێ مامێ من د ڕاپێن خۆ دا بکاردئینن بۆ نموونە ئێك ژ وان ڕاپەران بناڤێ جەیزی ژی دەنگێ مامێ من د ئەلبۆما خوە یا سترانان دا بکارئینایە، و من بخوە ژی میراتەکێ مەزن ژ مامێ خۆ یێ دەنگبێژ شاکرۆ وەرگرتیە».
