دەنگێ دەمژمێرێ
سەردار مەجید
ل گوندەکێ چیایی و دویر، پیرەمێرەکێ دانعەمر هەبوو بناڤێ «مام حەسەن»، مام حەسەنی دەمژمێرەکا دارین و کەڤن یا دیواری هەبوو، کو ژ باب و کالێن وی بۆ مابوو، ئەڤ دەمژمێرە نە وەک دەمژمێرێن ئەڤرۆ بوو؛ دەنگێ وێ یێ بلند بوو و هەمی خەلکێ گوندی پێ حەسیابوون. هەر تک-تکەکا وێ، ل ناڤ گوندی دهاتە بهێستن.
رۆژەکێ، گەنجەکێ ب ناڤێ «ئازاد» چوو نك مام حەسەنی و گۆتێ:
– «مامێ حەسەن، ئەڤ دەمژمێرە گەلەک یا کەڤن بووی و دەنگێ وێ یێ بێزارکەرە. بۆچی تو وێ ناهاڤێژی و ئێکا نوو و بێ دەنگ ناکری؟».
مام حەسەنی ب دلەکێ مەزن بەرێ خۆ دا گەنجی و گۆتێ:
– «کورێ من، تو ب تنێ ل دەنگێ ئاسنی گوهداری دکەی، لێ ئەز گوهدارییا تێپەربوونا ژیانا خۆ دکەم. ئەڤ دەمژمێرە ب هەر لێدانەکێ دبێژیتە من: هشیار ببه، دەمێ تە یێ دچیت و ئێدی ناڤەگەڕیت.»
پشتی چەند رۆژان، پاترییا دەمژمێرێ خلاس بوو و ڕاوەستیا، گوند هەمی کەفتە ناڤ بێ دەنگییەکا غەریب. خەلکێ گوندی شێلوبێل بوون؛ هندەک درەنگ ژ خەو رادبوون و هندەکان ژی کارێ خۆ یێ رۆژانە بەرزە دکر. ئازادی هەست کر کو تشتەکێ مەزن ل گوندی کێم بوویە.
ئازاد ڤەگەڕیا نك مام حەسەنی و گۆتێ:
– «مام، من نوکە زانی کو دەنگێ وێ دەمژمێرێ چەند یێ گرنگ بوو. بێ دەنگییا وێ، ژ دەنگێ وێ بێزارکەرترە!»
مام حەسەنی گۆتێ:
– «هەر تشتێ کەڤن دبیت، بێ مفا نینە. ئەڤ دەمژمێرە تێرا هندێ بوو کو مە ژ خەو راکەت و بهایێ دەقە و سەعەتان نیشا مە بدەت، هەر وەسا هێمایێ پێكڤەگرێدانا دو بەربابانە و بەردەوامییا ژیانێ یە.»
