دەنگێ من یێ بچووک گازی من دکەت
ژێهات حەكیم ئۆزمانی
مژێ دیمەن ل بەر چاڤێن من بەرزەکرینە، ژ دوویرڤە گوهـ ل دەنگەکێ نەرم و زارۆکانە دبم، ب ناڤێ من گازی دکەت، وەکی هەوایەکێ گەرم، دەنگ دووراتییێ د ناڤ وێ سپیاتییا مژێدا دبڕیت و بەرەڤ من ڤە دهێت و دبێژیت: «عەگید وەرە».
ب هەناسەیەکا کویرڤە هشیاربووم، ژۆر یا تاری و ڤالا بوو، من هزردکر ب تنێ خەونەکە و ب دووماهیک هات، بەلێ د شەڤێن دویڤدا وەکی نهێنییێن بەرزە ب هەمان دەنگ و ب هەمان شێوازێ گازیکرنێ دهاتەڤە. هەر ژ دویر دەنگی رێک دبڕی و د هات، خۆ د ناڤ گوهێن مندا ڤەدشارت و هەردەم بەری رۆژهەلاتنێ ب چەند خۆلەکان، ئەڤ خەونە ل من دبوو خودان و خەو ژ چاڤێن من ددزی.
د ناڤ هەر خەونەکێدا، ئەوی زارۆکی پێکۆل دکرن، ئەز ب دویڤ بکەڤم و هەردەم دا خۆ د ناڤ دیمەنەکێ کەڤنێ زارۆکینییا خۆدا بینم، جارەکێ د ناڤ حەوشا مە یا مالدا، جارەکێ ل بەر پەنجەرەیا پۆلا من و جارەکێ د ناڤ وێ دارستانا ئەڤە بیست ساله من سەرەدان بۆ نەکری، هەردەم دناڤ خەونێدا زارۆکی دکرە غار و ل دۆر خۆ نەدزڤری، بەلێ شوین پێیێن خۆ د ناڤ خیزیدا دهێلان و ئەو بەرزە دبوو، ئەز ل دووڤ دچووم، بەلێ من چ نە ددیت ژبلی وان دیمەنێن بچووکاتییێ.
خەون بەرهەمەکە ژ تۆڤەکێ کەڤن، هەست پێ دکەم، ئەڤ دیمەنێن دبینم ب تنێ بیرهاتن نینن، بەلکو هندەک هەلویستن، ب مەرەمڤە د ناڤ مندا هاتینە ڤەشارتن، ڤێ خەونێ هزر د مێشکێ مندا راوستاند بوون، وەکی کەلینا ئاڤێ، هەر چپکەکا ئاڤێ خۆ د یا دی وەردکر، بەلێ من نە دشیا چ ئەنجامان ب دەست خۆڤە بینم، ژبەر هندێ، دا کو پیچەک هەست ب ئارامییا مەژییێ خۆ بکەم، من دگەل خۆ گۆت: دڤێت ل کەسەکێ شارەزا بگەڕم، راستییا ڤێ خەونێ بۆ من پەیدابکەت. بەلێ هەر د وێ شەڤێدا ئەوا ڤێ هزرێ خۆ ل ناڤ مەژییێ من دای، زارۆکی ب هەمان دەنگ گازی من کر و گۆتە من «عەگید وەرە»، ل دویڤ وان شوین پێیان چووم، من خۆ ل ناڤ دارستانەکا چۆلكری و تژی داروباردا دیت، تیرۆژکێن رۆژێ خۆ ل پشت وی دیوارێ ب دارا و تەقنێ هاتییە ئاڤاکرن ڤەشارت بوو، زارۆک ل نک وێ دارا مەزن یا شکەستی، ئەوا ل نێزیکی وی دیواری یێ راوستای بوو و ب گڕنژینەکا بێگونەهـ و تژی خەمگینی یێ بەرێخودانا من دکەت.
ئەز نێزیک بووم، چەند پێنگاڤەکا ژێ دوور بووم، چاڤێن خۆ ب چاڤێن من ڤەنان و گۆت:
« من نەهێلە ب تنێ وەرە».
ژ نیشکەکێڤە، ب دەنگێ تۆپ و تەیاران دیمەن ژناڤ چوو ئەڤە ئەو دارستانە یا من دەیکا خۆ دناڤدا ژ دەستدای ژ ئەگەرێ رەڤین ژ رژێما بەعس، ئەڤە ئەو روودانە یا من دناڤ کویراتییا بیردانکا خۆدا ڤەشارتی.
چاڤێن من د ناڤ تەراتییا بالیفکا مندا ڤەبوون، رۆندکان خۆ د چاڤێن من نە دگرت و من هەست ب وێ گرانییا سالێن بێدەنگییێ دکر دناڤ دلێ خۆدا، ئاخ دادێ.. ئەو ژنکا هەردەم د ناڤ بیردانکا من دا ل بەر وێ دارا شکەستی ب دێمەکێ گڕنژین و بێگونەهـ و خەمگین تو بووی پشتی وێ شەڤێ ئەو دەنگە ل من بەرزەبوو و دوماهیکێ زارۆک زڤری مالا خۆ.
