دەهـ مایكرۆچیڕۆك
شەمال ئاكرەیی
دەم
ل گوندەكێ دویرە دەست، ژ نشكاڤە دەم بەرزەبوو. گوندی ژ خەو رابوون، دیتن كو رۆژ یا ل نیڤا ئەسمانی راوەستییایی، ئیدی چ رۆژ و شەڤێن نوی نە دهاتن. !
نامە
ل سەر لێڤا رویبارەكی، گووزكەكێ دەڤ گرتی هاتە دیتن، نامەیەك تێدا بوو، ب تیپێن ئاڤستایی ل سەر هاتبوو نڤیسین: “من ژ ڤێ پێلا ئالا رەش رزگار بكەن!
دار
تۆڤێ دارەكا نەناس هاتە چاندن، دارەك ژێ بلندبوو. خەلكەكێ كو شەهنازی ب دارا خۆ یا رەسەن نە دكر، ئەو دارا نامۆ پەرست!
پشیك
وێ پشیكێ هەر رۆژ ب گۆمان ل من دنێڕی. جارەكێ بەرزە بوو. ل دویڤ گەڕیام، من زانی یا چوویە د قەفەسا زێڕین دا!
دەمژمێر
ژ نشكەكێڤە، من دەمژمێرەك دیت ل سەر دەستێ من یا چێبووی. میلێن وێ بەرەڤاژی دزڤڕین. ئەز ژی هەر بچویك دبووم. نها ئەز یێ د پشتا باپیرێ خۆ یێ ٢١ێ دا.
خۆدیك
مرۆڤەكی ل خۆدیكێ نێڕی، كەسەك دیت، ب چ رەنگان وەكی وی نەبوو!
كۆپی
ل نیڤە شەڤەكێ، من گوهـ ل پستەپستەكێ بوو. ئەز ل دویڤ چووم. من كەسەكێ وەكو خۆ دیت. گۆتە من:” تۆ كۆپیێ منی و ئەز ئوریجینالم”.
دێم
ل سپێدەیەكێ، من دیت هەمی مرۆڤ بێ دێم یێن ماین. ماسك ببوونە قەتلازی و ب دەست كەسێ نەدكەفتن!
پێنڤیس
جارەكێ من پێنڤیسەك كڕی، هەر پەیڤەكا دویر ژ لوژیك و ویژدانێ من پێ نڤیسابا، دا ل من هەیتینیت!
پەرتووك
هەر جارەكا ئەو پەرتووكا نڤشتۆكان یا كو باپیرێ من ب میرات بۆ من هێلای ڤەدكر، ئەو كەسێن بەلەنگاز یێن نڤشتۆك بۆ هاتینە چێكرن، ل سەر بەرپەڕێن وێ خۆیا دبوون و هێشتا بەلەنگازتر لێ هاتبوون!
