دەڤەرا پێشەسازیا كانی سپی دێ پێنچ هزار دەلیڤەیێن كاری پەیدا كەت
بەرپرسێ راگەهاندنا رێڤەبەریا گشتیا وەبەرهێنانێ ل پارێزگەها دهوكێ دیاركر، دەڤەرا پیشەسازیا كانی سپیێ كۆ لسەر ئاستێ ئیراقێ پرۆژەكێ ستراتیژی و مەزنە و دێ دەلیڤێن مەزن بۆ وەبەرهێنانێ ب تایبەتی دەلیڤێن كاری پەیداكەت.
فەلاح حاجی بەرپرسێ راگەهاندنا رێڤەبەریا گشتیا وەبەرهێنانێ ل پارێزگەها دهوكێ بۆ ئەڤرۆ نیوز راگەهاند، ل ڤان نێزیكان دێ دەڤەرا كانی سپیێ كو دەڤەرەكا تایبەتە ب پێشەسازیا خوارنێ بدوماهیك هێت و وەبەرهێنەر دێ شێن وەبەرهێنانێ تێدا بكەن، هەر دیسان ب هەمان شێوە، دپلان دایە دەڤەرەكا دیتر یا پیشەسازیا خوارنێ دناڤبەرا هەرسێ قەزایێن بەردەڕەش و ئاكرێ و شێخان بهێتە دروستكرن.
گۆت ژی: دەربارەی دەڤەرا پیشەسازیا كانی سپیێ ئەو دێ گهۆڕینەكا مەزن و بنگەهی دوارێ پیشەسازیا خوارن و كۆگەهكرنا بەرهەمێن خوارنێ و جوتیاراندا چێكەت.
دیار ژی كر، ئەڤ دەڤەرە لسەر رووبەرێ (1423) دۆنەمێن ئەردی دهێتە ئاڤاكرن، (275) كارگەهێن جودا جودا تێدا دهێنە دانان، (229) كۆگەهێن ساركەر و كۆگەهێن ئاسایی تێدا دهێنە چێكرن و زێدەتر ژ (5 هزار) دەرفەتێن كاری بۆ ولاتیان دهێنە رەخساندن، ژلایێ هەردوو كۆمپانیێن (Legacy Construction & Innovate Construction)ــە دهێتە بجهئینان، دەستووریا هژمارە (1040) ژ وەبەرهێنانا دهۆكی وەرگرتیە، سەرمایێ پڕۆژەی ژی زێدەترە ژ (70 ملیار) دیناران، خزمەتگوزاریێن دەستپێكێ ژی وەك جادە و ئاڤ و كارەبا ب دوماهیك هاتنە.
