دەڤەردارێ ئاكرێ: ئەڤ سالە ئاگرێ نەورۆزێ پشتی فتارێ دێ هێتە هەلكرن
رەمەزان زەكەریا:
بەرهەڤیێن كەرنەڤالا نەورۆزا ئەڤ سالە یا ئاكرێ دەستپێكرینە، ئەڤ سالە بەرنامەیەكێ تایبەت هاتیە دانان و بڕیارە پشتی فتارێ ئاگرێ نەورۆزێ ل جهێن هاتینە دیاركرن بهێتە هەلكرن.
د. دلاوەر بۆزۆ، دەڤەردارێ ئاكرێ بۆ ئەڤرۆ گۆت: «بەرهەڤیێن نەورۆزێ دەستپێكرینە و باژێر و جهێ ئاهەنگێ هاتیە دیاركرن و پشكنین بۆ هاتیە كرن».
ناڤبری گۆتژی: «نەورۆزا ئەڤ سالە د مەها رەمەزانێ دایە، لەو ئەڤ سالە ئاهەنگا نەورۆزا ئاكرێ دێ یا جودا و تایبەت بیت، چالاكیێن هەلكرنا ئاگری دێ پشتی فتارێ دەستپێكەن و بۆ دەمێ دو دەمژمێران دێ بەردەوام بن، چەندین سرودێن ئایینی د ناڤ ئاهەنگێ دا دێ هەبن، كۆمەكا یاریێن ئاگری یێن نوو دێ هێنە ب كارئینان، كو د سالێن بۆری دا نەبوون».
