دەڤەردارێ ئامێدیێ: د نێزیكترین دەم دا نەخۆشخانەیا شۆڕەش – هێتیت دێ هێتە ڤەكرن
ئامێدیێ، مەحمود نهێلی:
دەڤەردارێ ئامێدیێ دیار كر، د نێزیكترین دەم دا نەخۆشخانا شۆڕەش – هێتیت ب هەموو ئامیرە و پێدڤیێن خوە ڤە دێ هێتە ڤەكرن و كەڤیتە د خزمەتا وەلاتیان دا.
وارشین سەلمان، دەڤەردارێ ئامێدیێ بۆ رۆژناما ئەڤرۆ گۆت: «كابینەیا نەهێ یا حكومەتا هەرێما كوردستانێ گرنگیەكا زۆر دایە دەڤەرێن دووری دەست، ب تایبەتی ژی دەڤەرا ئامێدیێ و كەرتێ ساخلەمیێ، ب سوپاسی و خۆشحالی ڤە ئێك ژ بەرهەمێن كابینەیا نەهێ یا حكومەتێ چێكرنا نەخۆشخانەیا 100 تەختی یە ل كۆمەلگەها هێتیتێ ل سنۆرێ ناوچەدارییا دێرەلۆكێ«.
گۆتژی: «ئەڤ نەخۆشخانە ب كوالێتیەكا گەلەك باش هاتیە چێكرن و ئامیرێن هەری باش و پێشكەفتی بۆ هاتینە دابینكرن، ئەو ئامیرەیێن بۆ ڤێ نەخوشخانەیێ هاتینە دابینكرن جێدبیت ل هەموو كوردستانێ و ئیراقێ نەبن، دیسا ستافێ پێدڤی بۆ هاتیە دابینكرن و هەموو بەرهەڤی هاتینە كرن و د ڤان چەند رۆژان دا دێ هێتە ڤەكرن و كەڤیتە د خزمەتا هەموو خەلكێ دەڤەرێ دا».
