دەڤەرەكا پیشەسازی یا هەڤچەرخ ل زاخۆ دهێتە دروستكرن
ئەڤرۆ
دهۆك، لەزگین جوقی:
سەرۆكێ ژوورا بازرگانی و پیشەسازی ل پارێزگەها دهۆكێ دیار كر، دەڤەرەكا پیشەسازی یا هەڤچەرخ ل ئێدارا سەربخوە یا زاخۆ دهێـتە دروستكرن و پشتەڤانیا سەرمایەدار و وەبەرهێنەران دهێتە كرن، كو كارگەهان ل زاخۆ بدانن.
ئەیاد حەسەن، سەرۆكێ ژوورا بازرگانی و پیشەسازی ل پارێزگەها دهۆكێ بۆ رۆژناما ئەڤرۆ دیار كر، لیژنەك ب سەرپەرشتیا گوهدار شێخۆ، سەرپەرشتێ ئێدارا سەربخوە یا زاخۆ بۆ كەرتێ پیشەسازی ل زاخۆ هاتیە پێكئینان و گۆت: «ئەڤ لیژنە نوكە پشتەڤانیا سەرمایەدار و وەبەرهێنەران دكەت، كو ل زاخۆ كارگەهێن هەمەجۆر یێن پیشەسازی ب دانن، هەروەسا دەڤەرەكا هەڤچەرخ یا پیشەسازی ل زاخۆ دهێتە دروستكرن و نوكە گەلەك گرنگی ب دانانا كارگەهێن پیشەسازی ل زاخۆ دهێتە دان».
ناڤهاتی گۆتژی: «د وێ دەڤەرا پیشەسازی دا پشكێن خوارنێ و هەموو پشكێن دی یێن كارگەهێن پیشەسازی دێ هێنە ژێكجوداكرن، دیسا ژینگەه تێدا بەرچاڤ دێ هێتە وەرگرتن و ژینگەها دەڤەرێ دێ هێتە پاراستن و هەموو كارگەه ل دووڤ ستاندەردێن جیهانی دێ هێنە دانان».
