دەھ هەناسەیێن هەلاویستی
قەهرەمان عەبدوللا بەرواری
دەم:
میلێن دەمژمێرا دیواری ..
وەکو هەسپێ (بۆزێ رەوان) رابوونە چاریان..
میل وەکو سمێن هەسپی ماچی شوین پێن ئێک دکەن..
ئەز وەکو سیبەرا میل و سمان ..
بوویمە زیندانییێ نالینێن خۆ..
ئەڤین:
ب جسارەتڤە .. گولەکا سۆر بشکوڕی ..
وەکو گڕنژینا زارۆکەکێ ساڤا ..
د ناڤبەرا چاڤ و بروییاندا بەلگ وەریان ..
بەلێ بێهنا بەلگێن وێ خمخمکێن دفنا من کرنە حەوینگەھ و
پەردێن دلێ من کرنە ناوسک.
ئۆمێد:
د بیابانا تاریاتیێ دا .. داوی شەمالک..
د قولاچکا گەردوونیدا .. ب ماندیبوونڤە دگڕنژیت.
گوڕی یا وێ .. بۆ ڤی لای خوار دبیت ..
بۆ لایێ دیتر خوار دبیت ..
د سەکەراتا خۆ دا دهلنگڤیت..
ژنشکەکێڤە کێل دراوەستیت..
وەکو رۆستەمێ زال و دبیتە هەتاڤ و ..
گیانێ من روون دکەت.
خەم:
دەریایەکا هار و دین
دخوڕیت وەکو کێلبێن هۆڤ و گورگین
پێل ل پەی پێلێ .. من دادعویرن ب کەرب و کین
ئەز وەکو بەرکەکێ کریستالی یێ بچویک نقۆ دبم و ..
هەر نقۆ دبم.
بتنێ:
کورسیکێن ڤالە لۆرینکا ب من دبێژن ..
شەڤێن درێژێن زڤستانی.. نانەکێ رەش ..
بۆ خەوەکا خاڤ دپێژن.
بێ دەنگییا من بوویە هەوارییەکا بەستی گرتی و
قێری و گازیێن کپ هێشتا هێژن.
غەریبی:
چانتەیەکا تەمەت هەمبێزا زارۆکەکێ ساڤا ..
ب ملێ من ڤە وەستیا و.. دکەت لاڤەلاڤا
رێکێن بەراهیکا من د بێ چرانە ..
د بێ سەر و .. دبێ سیمانە ..
دلێ من .. گەشتەڤانەکێ بێ بوصەلەیە و ..
هزار رێک و هزار تەلهە..
ل بەندا منن دپیڤن بەژنێن داڤا.
مرن:
دارا ژیانێ وەکو بای دلەیزیتن چەپ و راست
بەلگ کۆم کۆمە دوەریێن و لاشێ من دنخێڤن چەپ و راست
بەلێ رهێن دارێ خۆ د دەست و پێن من دئالینن ..
وەکو نۆژێ و من رادکێشن خوار چەپ و راست
ئو.. جارەکا دی ل سەر سنگێن مە ..
دار و گول شین دبن چەپ و راست
باران:
چپکێن هویر دبارن ل سەر رویکێن پەنجەرێ ..
دبن جۆک و سیتافکێن وان وەک داڤان ..
ریبارێن بێ زاخ هار دکەن
ل سەر رویکێن دلبەرێ
جادە و رێک و بان ..
دەست و مل و شان ..
بۆ مان و مانێ دکەن شەرێ..
بەلێ ئەز د پەنجەرا خۆ یا د زکێ بیابانێدا ..
تێهنی و بی ئاڤ ..
دکەم گری و فیغان وەکو بەرێ.
بەرزەبوون:
هەیڤا چواردەشەڤی ..
دبن پەردێن عەورێن رەش ڤە ..
وەکو دێوەکێ پیرهەڤی ..
بوویە تۆکا نەعلەتا ترسێ و ..
مایە ب چاڤێن منێن نیڤ گەش ڤە..
شەڤ کرنە سال..
ب کەمەرا منڤە .. خەم کرنە شال ..
ئو.. ئەز وەکو ستێرەکا شەپرزە ..
مایمە بەرزە ..
مایمە هەلاویستی ..
ب قنارا دوو چاڤێن دەڤ بەش ڤە.
بیرهاتن:
پەرتووکەکا کەڤنار..
وەکو پیرەکێ پشت خوار ..
ژ ئازارا دکەتە هەوار..
پەرێن وێ هێدی .. هێدی..
ب هەردو ملان خۆ دخون..
پرت پرت ژێ دبارن لێڤ ..
بەلێ بێهنا وێ ئەز کرمە زارۆکەکێ شەش سال ..
د دویڤ دایکا خۆ را دکەتە غار ..
