دەیڤد رۆش: پڕۆژە قانوونا حەشدا شەعبی بهێتە پەسەندكرن، دێ ئەمریكا ب توندی ئیراقێ سزا دەت
بەرپرسەكێ بەرێ یێ وەزارەتا بەرگرییا ئەمریكا ئاشكراكر: پەسەندكرنا پڕۆژە قانوونا حەشدا شەعبی دێ سەروەرییا ئیراقێ ئێخیتە د مەترسیێدا و ئەمریكا هەلوەستێ خوە ب باشێ گەهاندیە ئیراقێ.
دەیڤد دی رۆش، بەرپرسێ پێشتر ل وەزارەتا بەرگرییا ئەمریكا، گوت» پڕۆژە قانوونا حەشدا شەعبی د بەرژەوەندییا ئیرانێ دایە و خزمەتا هەژموونا ئیرانی ل ئیراقێ و دەڤەریچ دكەت، پشكەك ژ وان گرۆپێن ل بن سیبەرا حەشدا شەعبی ژ ئالیێ ئەمریكا د لیستا تیرۆرێ دانە، ئەمریكا رێكێ نادەت ئەڤ گرۆپە بهێنە دەزگەهكرن، چونكە خزمەتا ئیرانێ دكەن».
دەیڤدی گوت ژی» دەربازكرنا ڤێ پڕۆژە قانوونێ، دێ ئیراقێ ئێخیتە بن پرسیارێ و خزمەتا وەلاتی ناكەن، هەروەسا ئەمریكا گەلەك ب باشی هەلوەستێ خوە گەهاندیە ئیراقێ، هەكە هات و ئەڤ پڕۆژە قانوونە بهێتە پەسەندكرن، دێ ئەمریكا ب توندی ئیراقێ سزا دەت و د بەرژەوەندییا وی وەلاتیدا نابیت». ئاماژەكر ژی» ئەگەر هەیە ژ بەر ڤێ پڕژە قانوونێ توندوتیژی دروست ببیت».
هەڤدەم بالیۆزخانەیا ئەمریكا ل ئیراقێ بەلاڤكر» ستیڤن فەیگن، بالیۆزێ ئەمریكا ل ئیراقێ ب وەكالەت ل گەل موحسن مەندەلاوی، جێگرێ ئێكێ یێ سەرۆكێ جڤاتا نوونەرێن ئیراقێ كۆمبوویە و هەردویان گەنگەشە ل دۆر پڕۆژە قانوونا پێشنیازكری یا حەشدا شەعبی كر».
بالیۆزخانەیا ئەمریكا ل ئیراقێ دیاركریە ژی» ماركۆ روبیۆ، وەزیرێ دەرڤەیێ ئەمریكا دوپاتكریە كو پەسەندكرنا وێ پڕۆژە قانوونێ، دێ هەژموونا ئیرانێ ل ئیراقێ زێدەتر لێكەت و گرۆپێن چەكدار یێن تیرۆرستی دێ ب هێزتر كەت، ئەڤە ژی گەفە ل سەروەرییا ئیراقێ».
ئەمریكا دووماهی ئاگەهداركرن دایە سەرۆك وەزیرێن ئیراقێ و جڤاتا نوونەرێن ئیراقێ، هەكە دەنگ ل سەر پڕۆژە قانوونا حەشدا شەعبی ل جڤاتا نوونەران بهێتە دان، ئیراق و دەزگەهێن ئەمنی دێ روو ب روویێ سزایێن توند بن، چونكە ل دەف ئەمریكا پەسەندكرنا ڤێ پڕۆژە قانوونێ، دێ هەژموونا ئیرانێ ل ئیراقێ زێدەكەت و دێ بیتە ئەگەرێ ب هێزبوونا گرۆپێن چەكدار یێن حەشدا شەعبی.
هەڤدەم لژنەیا ئاسایش و بەرگریێ ل جڤاتا نوونەرێن ئیراقێ، بێی بەرهەڤبوونا پەرلەمانتارێن كورد و سوننە ئەو پڕۆژەقانوونە پەسەندكر و هنارتە دەستەیا سەرۆكایەتییا جڤاتا نوونەران، بۆ وێ چەندێ بێخیتە بەرنامەیێ كارێ روونشتنێن داهاتی یێن جڤاتا نوونەران.
ب گۆڕەی وێ پڕۆژە قانوونێ، حەشدا شەعبی دێ بیتە خودان ئەكادیمییا لەشكری، هەروەسا دڤێت سالانە بودجەیەكا تایبەت بۆ بهێتە تەرخانكرن و دشێت وەك دەزگەهەكێ دەولەتێ پارەی ژ وەلاتێن دی ژی وەربگریت و سەرۆكێ دەستەیا حەشدا شەعبی ژی دێ دەستهەلاتا بلند هەبیت و دێ بەرپرس بیت ژ دیاركرنا دەستهەلاتا گرۆپێن حەشدا شەعبی.
