د ئاستێ نێڤدەولەتی دا تورکیا جهێ باوەریێ نینە
ب، سه‌رجان مەحمود:
سەرۆکێ کۆمسیۆنا کاروبارێن دەرڤە ل پەرلەمانێ ئۆرۆپا دیار دکەت، ل تورکیا دادگەهـ سەربخوە نینن و ئازادیا رۆژنامەڤانی ژی نینە، ژ بەر ڤێ یەکێ ژی تورکیا نەشێت ببیتە ئەنداما ئێکەتیا ئۆرۆپا، وەزارەتا دەرڤە یا تورکیا ژی ب توندی بەرسڤا وی بەرپرسێ ئەلمانیا ددەت و دیار دکەت، دڤێت وەلاتێن ئێکەتیا ئۆرۆپا ل هەمبەر ئەندامەتیا تورکیا ئێدی خوە ئێکلا بکەن.
میشل رۆت سه‌رۆکێ کۆمسیۆنا کاروبارێن ده‌رڤه ل په‌رله‌مانێ ئه‌لمانیا، د داخۆیانیەکا رۆژنامه‌ڤانی دا راگه‌هاند کو هه‌ڤدیتنێن ره‌جه‌ب ته‌یب ئه‌ردۆغان یێن ل ئه‌لمانیا گرنگن، لێ ئه‌ردۆغان ب هه‌لوەستێن خوه یێن ل دژی ئسرائیلێ و هه‌رێمێ باوه‌ریا خوه ژ ده‌ست دایه و گۆت: (ئه‌ردۆغان نه ب گه‌رمی هاته پێشوازیکرن و نه ژی داخوازیێن وی هاتنە قه‌بوول کرن. ژ به‌ر کو تورکیا د گه‌له‌ک واران دا ژ ئۆرۆپا دوور که‌فتیه و هه‌که ئه‌ردۆغان هه‌لوەستێ خوه یێ ل سه‌ر بنه‌مایێ دژایه‌تیا ئسرائیلێ به‌رده‌وام بکه‌ت و پشته‌ڤانیا حه‌ماسێ بکه‌ت دێ کورسیکا خوه یا ل کۆنسه‌یا ئۆرۆپا ژی ژ ده‌ست ده‌ت).
ناڤهاتی هه‌روه‌سا راگه‌هاند ژی کو ره‌وشا ناڤخوە یا تورکیا باش نینە و د وارێن مافێن مرۆڤی، ئازادیا رۆژنامەڤانیێ و سه‌رخوه‌بوونا دادگه‌هان و دیموکراسیێ دا تورکیا گەلەک ژ ئێکەتیا ئۆرۆپا یا دوورە و گۆت: (گه‌له‌ک ئاشکرایه کو ده‌وله‌تا تورکیا بریارێن دادگه‌ها مافێن مرۆڤی یا لاهه‌ی بجهـ نائینیت و گۆهـ ناده‌ته بریارێن دادگه‌هێ و ئه‌و یه‌ک وه‌سا دکه‌ت کو ده‌رگەهێن ئێکەتیا ئۆرۆپا بۆ تورکیا بهێنه داخستن. دیسان رۆژ ب رۆژێ ره‌وشا دادوه‌ریێ و دادگه‌هان خرابتر دبیت و سه‌رخوه‌بوونا دادگه‌هان نه‌مایه و ره‌وشا مافێن مرۆڤی و دیموکراسیێ ژی گەلەک خرابه و ب ڤێ ره‌وشا خوه تورکیا نەشێت نێزیکی ئێکەتیا ئۆرۆپا ببیت).
سه‌رۆکێ کۆمسیۆنا کاروبارێن ده‌رڤه ل په‌رله‌مانێ ئه‌لمانیا د دووماهیا ئاخڤتنا خوه دا ژی راگه‌هاند کو ئه‌ردۆغان ب هه‌لوەست و کریارێن خوه تورکیا ژ ئێکەتیا ئۆرۆپا دوور کریه، تورکیا نها تنێ مایە، د ئاستێ رۆژهەلاتا ناڤین دا ژی ئێدی تورکیا ئەو وەلاتێ جاران نینە و پەیوەندیێن وێ ل گەل پرانیا وەلاتێن رۆژهەلاتا ناڤین ژی باش نینن و ب تنێ مایە و د ره‌وشا نها دا د ئاستێ نێڤده‌وله‌تی دا ژی تورکیا ئێدی نه جهێ باوه‌ریێ یه و گۆت: (ب راستی ژی ئه‌م گرنگیێ ددەینە په‌یوه‌ندیێن ل گەل تورکیا، لێ ئه‌م نەشێین چاڤێن خوه ژ بنپێکرنێن نها ل تورکیا بگرین. راسته پێدڤیا مه ب تایبه‌ت د بابەتێ په‌نابه‌ران دا ب تورکیا هه‌یه، لێ د هه‌مان ده‌می دا پێدڤیا تورکیا ژی گه‌له‌ک زێده ب وه‌لاتێ مه هه‌یه و نها هژماره‌ک زێده وه‌لاتیێن تورکیا ل وه‌لاتێ مه دژین. ئەز ئاشکرا دبێژم هەکە تورکیا دەست ب قۆناغەکا نوو بکەت، چاکسازیان بکەت، وەکو ئەلمانیا ئەم بەرهەڤین د گەلەک بیاڤان دا هاریکاریا تورکیا بکەین، لێ مخابن د رەوشا نها دا تورکیا گەلەک ئاریشێن خوە هەنە، ئەو یەک ژی ئاستەنگیەکا مەزن ل هەمبەر ئەندامەتیا تورکیا د ناڤ رێزێن ئێکەتیا ئۆرۆپا دا دروست دکەت، پرانیا وەلاتێن ئێکەتیا ئۆرۆپا ژی د رەوشا نها دا رازی نینن تورکیا ببیتە ئەنداما ئێکەتیا ئۆرۆپا).
ل ئالیێ دی وەزارەتا دەرڤە یا تورکیا ژی دوهی راگەهاند، هەلوەستێ هندەک ژ بەرپرسێن ئەلمانیا خزمەتا پەیوەندیێن هەر دو وەلاتان ناکەت، چونکی ل تورکیا دادگەه کارێ خوە دکەن و کەس نەشێت دەستێوەردانێ د کاروبارێن دادگەهان دا بکەت، د بیاڤێن مافێن مرۆڤی و ئازادیا رادەربرینێ دا ژی نها رەوشا تورکیا گەلەک باشە، هندەک بابەت هەنە گرێدایی ب ئاسایشا تورکیا نە و نابیت هندەک تشت تێکەلێ هەڤدو بهێنە کرن، لێ تورکیا پتر ژ هەر دەمەکێ یا بەرهەڤە ببیتە ئەنداما ئێکەتیا ئۆرۆپا و دڤێت ئێدی وەلاتێن ئەندامێن ئێکەتیا ئۆرۆپا ژی سەبارەت ب ئەندامەتیا تورکیا خوە ئێکلا بکەن.
