د.ئاڤا غازی: گوهۆرینا هزرێ ل سه‌ر رۆژیێ پێنگاڤه‌كه بو نه‌هێلانا توره‌بوونێ
دهۆك، شڤان لقمان:
د. ئاڤا غازی رشید تایبه‌تمه‌ندێ نه‌خوشیێن ده‌رونی دیاركر هنده‌ك كه‌س ده‌مێ روژی گرتنێ توره‌دبن، هه‌روه‌سا هنده‌ك كه‌س هه‌نه د بنه‌ره‌ت دا د توره‌نه و نه‌شێن كونترولا توره‌بوونا خوه بكه‌ن ده‌مێ روژی گرتنێدا و گۆت: سه‌ره‌ده‌ریكرنا كه‌سێن توره دگه‌ل روژیگرتنێ پێدڤیه هه‌لسه‌نگاندنێ د هزرێن خوه دا بكه‌ن، ئه‌وێن لسه‌ر روژیێ هه‌ین كا بوچی رۆژیێ دگرن یان رۆژی چ رامان د ده‌ت ل ده‌ڤ وان، بۆ نمونه هنده‌ك كه‌س وێ هزرێ د ده‌نه رۆژیێ كو ب تنێ نه‌خۆت و نه‌ڤه‌خۆت سپێدێ هه‌تا مه‌غره‌ب، یان رۆژی ل ده‌ڤ وان زه‌حمه‌ت و وه‌ستیانه و به‌رێ وان ل ده‌مژمێرێ یه كا چمایه بو بانگ.
تایبه‌تمه‌ندێ نه‌خۆشیێن ده‌روونی دازانین رۆژیگرتنێ چه‌ندین ئارمانجێن كوور هه‌نه كو پێدڤیه كه‌سێن رۆژیگر هزر تێدابكه‌ت و گۆت: ده‌مێ كه‌سێن توره هزرا خوه د گوهۆرن ل سه‌ر رۆژیگرتنێ پێنگاڤه‌كا باشه كونترولا توره‌بوونا خوه بكه‌ن، هه‌روه‌سا روژیگرتن ده‌لیڤه‌كه كو ئه‌م خوه بگوهۆرین و پاقژكرنا نه‌فسامه‌یه ژ نه‌ڤیانێ و گه‌له‌ك تشتێن دی یێن خه‌له‌ت كو ل ده‌ڤ مه‌هه‌ین، هه‌روه‌سا رۆژی ده‌لیڤه‌یه كو ره‌فتارێن مه راستڤه‌ببن و خه‌و دووربكه‌ین ژ گۆتنا وان په‌یڤێن كه‌سێن به‌رامبه‌ر د ئێشینیت، هه‌روه‌سا رۆژی نیشا مروڤی دده‌ت كو ته شیانێن هه‌ین زالبی لسه‌ر حه‌زێن خوه كو خوارن و ڤه‌خارنن و حه‌زه‌كا خورسكیه ل ده‌ڤ مرۆڤی و مرۆڤ كونترول دكه‌ت، هه‌روه‌سا حه‌زا سێكسی كو مروڤ كونترولا وێ دكه‌ت بو ده‌مێ رۆژیگرتنێ دا، رامانا ئه‌ڤێ ئه‌وه كو مروڤ دشێت گه‌له‌ك گوهرینا د ژیانا خوه دا بكه‌ت..
د. ئاڤا غازی رشید خویاكر، مروڤ سیفه‌تێن خوه دنیاسیت ده‌مێ كاره‌كی یان ره‌فتاره‌كێ یان چوونا جهه‌كی دبیت مروڤی توره‌كه‌ت، پێدڤیه مروڤ هه‌ول بده‌ت ده‌مێ نه یێ ئاماده نه‌چیته وان جهان وگۆت: ئه‌و دانوستاندنێن بێ مفا كو دبیت ژ سیفه‌تێ دانوستاندنێ ببیته جه‌ده‌ل و توره‌بوون په‌یدا بیت، پێدڤیه مروڤ خوه دوورلكه‌ت ژ وان دانوستاندنان و به‌رنامه‌كێ رێكخستی هه‌بیت و مفای ژ ڤێ هه‌یڤێ ببینیت.
تایبه‌تمه‌ندێ نه‌خوشیێن ده‌روونی ئه‌وژی دیاركر خوارنا پاشیڤێ یا گرنگه وگۆت: هاتنا خوارێ یا رێژا شه‌كرێ دبیت مروڤ پێ تووره‌ببیت، هه‌روه‌سا رێكخستنا خه‌وێ كو گه‌له‌ك كه‌س ل هه‌یڤا ره‌مه‌زانێ خه‌وا وان نه یارێكخستیه و كارتێكرنێ ل سه‌ر مروڤی دكه‌ت و توره‌ببیت، كه‌سێن رۆژیگر ئه‌وێن جگار كێش دبیت ل ده‌مژمێرێن دووماهیێ ژ رۆژیگرتنێ تووره‌ببن، چونكی له‌شێ وان داخازا نیكوتینێ دكه‌ت و ژبه‌كو ب رۆژینه نه‌شێن جگاره‌یان بكێشن، ره‌مه‌زان ده‌لیڤه‌كا باشه كو ئه‌ڤ كه‌سه جگاران بهێلن دبیت بو ده‌مێ حه‌فتیه‌كێ نه‌كێشن و دبیت پیجه‌ك بارێ ده‌روونی نه‌یێ باشبیت، به‌لێ پشتی چه‌ند رۆژان بشێن كونترولا خوه بكه‌ن و دوور بكه‌ڤن ژ جگارێ.
