د.ئەحمەد قاسم : ب قەر باسکت بۆلا پارێزگەھێ پشکداری د قارەمانیا کوردستانێ دا کر
ئەڤرۆ نیوز، قەیس وەیس:
سەروکێ نوونەراتیا دھۆک یا لیژنا ئۆلۆمپیا کوردستانێ بۆ ئەڤرۆ نیوز دیارکر چو لایەنان ھاریکاریا تیما باسکت بۆلا پارێزگەھێ نەکر پێخەمەت پشکداریێ د قارەمانیا ھەلبیژارتیێن پارێزگەھێن کوردستانێ و ب قەر مە تیم ھنارتیە و بوویە قارەمانا کوردستانێ.
زێدەتر د.ئەحمەد قاسم بۆ ئەڤرۆ نیوز گۆت: ھەلبژارتیێ پارێزگەھێ یێ باسکت بۆلێ قەستا ھەولێرێ کر بێی چو ھاریکاریەک بۆ بھێتە کرن و مە ب فەرمی داخاز ژ پارێزگەھا دھۆکێ کر ھاریکاریا ئەڤی ھەلبژارتیێ بکەن ژبەر کو نوونەرێن پارێزگەھێ نە و بناڤێ دھۆکێ دێ پشکداریێ د قارەمانیا کوردستانێ بن لێ چو بەرسڤ نەبوون لەورا نەچار بووین ب قەر ھندەک کوژمەکێ پارەی سەروکێ ئێکەتیا باسکت بۆلا پارێزگەھێ ئامادە کرن و بەر ب قارەمانیێ چوون و شیان بنە قارەمان ژی ل سەر ئاستێ کوردستانێ.
ناڤھاتی ئەو چەندە ژی دیارکر ژ بەر نەبوونا داھاتێ دارایی نوونەراتیا دھۆکێ نەشیا ھاریکاریا ھەلبژارتیێ پارێزگەھا دھۆکێ بکەت بەری بەر ب قارەمانیێ بچیت و تنێ ئەو شیان ھندەک جلوبەرگان بۆ ئامادە بکەن و مەزاختیێن وێ نوکە قەرن ل سەر نوونەراتیا دھۆکێ یا لژنا ئولومپی و پێدڤیە ل ماوێ بھێت ئەدا بکەین.
دەربارەی شێوازێ دەستنیشان کرنا راھێنەرێ ھەلبژارتیێ پارێزگەھێ یێ باسکت بۆلێ د. ئەحمەد گۆت: دەستنیشان کرنا ھەلبژارتنا راھێنەرێ ھەلبژارتیێن ھەمی ئێکەتیێن ب سەر نوونەراتیا دھۆک یا لژنا ئولومپی ڤە ل دویف بەرھەم و ئەنجامێن ب دەستڤەئیناین دھێنە دیارکرن، چەندین راھێنەرێن خودان شیان ل پارێزگەھێ ھەنە لێ ئێکەتیا باسکت بولا پارێزگەھا دھۆکێ باوەری دا راھێنەر جوتیار عەلی و شیا ل جھێ وێ باوەریێ بیت وناسناڤێ کوردستانێ بەرەف پارێزگەھا دھۆکێ ڤە بینت.
