د. ئەحمەد قاسم: ب كۆمەكا خالێن گرنگ دگەل لژنەیا ئۆلمپییا ئیراقێ رێكکەفتین
دوهی ب سەرپەرشتییا رەعەد حەمۆد سەرۆكێ لژنەیا ئۆلمپی یا ئیراقێ كۆمبوونەكا بەرفرەهـ دگەل نوونەرێن هەمی پارێزگەهێن ئیراقێ و كوردستانێ یێن لژنەیێن ئۆلمبی كۆمبوو، ژبۆ گەنگەشە و دانۆستاندن ل سەر چەند بابەتێن گرێدایی ب كارێن كارگێری و چالاكیێن وەرزشی، ل دووماهیێ ب لاپەرێ كاری گەهشتنە كۆمەكا بڕیاران.
د. پ. ئەحمەد قاسم سەرۆكێ نوونەراتییا دهۆك یا لژنەیا ئۆلمپی بۆ رۆژنامەیا ئەڤرۆ گۆت: كۆمبوونا دوهی یا ب بەرهەم و گەلەك یا فەر ژی بوو، ژبەركو هەمی نوونەرێن پارێزگەهان ژ وانا یێن كوردستانێ بەرهەڤی كۆمبوونێ بوون و گەنگەشە و راسپارد و بۆچوونێن جودا و باش هاتنە كرن، ل دووماهیێ كۆمەكا خالێن گرنگ هاتنە پەسەندكرن ژ وانا، ڤەگەڕاندنا سلفا دارایی بۆ هەمی نوونەرێن سەر ب لژنەیا ئۆلمپی یێن پارێزگەهان و دڤێت ئەو سلفە ژ هەژی بیت و بۆ هەمی لایەنێن كار و چالاكییان دابینبكەت هەیڤانە یان سێ هەیڤان جارەكێ بهێتە پارڤەكرن، دیسان پارەكێ تایبەت بۆ چالاكیێن وەرزشا ئافرەتان بهێتە دابینكرن، هەروەسان دەستەبەركرنا كۆمەلایەتی بۆ فەرمانبەرێن نوونەرێن لژنەیا ئۆلمپی هاتە پەسەندكرن.
هەروەسان ناڤهاتی دیار كر رێكەفتن ل سەر دانانا خولێن بهێزكرنێ یێن دارایی و كارگێری بۆ سكرتێر و بەرپرسێ دارایی یێن نوونەراتیان هاتە كرن، دیسان سەرپەرشتییا هەلبژارتنێن یانەیێن وەرزشی ل پارێزگەها ژ ئەركێ نوونەراتیێن لژنەیا ئۆلمپی نە، دیسان تەرخانكرنا پارەكێ تایبەت بۆ دانانا خولان و قارەمانیێن جورە و جور بۆ هەر هەلكەفتەكا نشتیمانی دا و رۆژا ئۆلمپی یا جیهانی بهێتە كرن، هەروەسا بڕیار هاتیە دان لژنەكا ئاست بلند ژ نڤێسینگەها تەنفیزی سەرەدانا هەمی نوونەرێن لژنەیێن ئۆلمپی ل ئیراقێ و كوردستانێ بكەن و سەرەدانا لایەنێن حوكمی بكەن ژبۆ دۆپاتكرنا پشتەڤانیا دارایی بۆ نوونەراتییان.
