د ئەڤ سالەدا سێ پێشانگەهـ ل ئەلمانیا ڤەكرینە
زنار تۆڤی:
خالد حسێن شێوەكارەكە، خەلكێ باژێرێ عەفرینێ یە ل رۆژئاڤایێ كوردستانێ و نوكە ل وەلاتێ ئەلمانیا دژیت، د دیدارەكێ دا بۆ رۆژناما ئەڤرۆ دبێژیت: ل سالا 2009 من پەیمانگەها هونەرێن جوان پشكا هونەرێ شێوەكاری ل حەلەبێ ب دووماهی ئینایە، ئەڤ سالە من سێ پێشانگەهێن شێوەكاری ل سێ باژێرێن ئەلمانیا ڤەكرینە، خەلكێ ئەلمانی گەلەك حەز ژ كارێن من یێن هونەری دكەن و گەلەك هاریكاریا من ژی دكەن، دیسان ژ ئەنجامێ وێ ئەر دهەژا ئەڤ سالە ل رۆژئاڤایێ كوردستانێ چێبوویی مە هاریكاری ب رێیا وان پێشانگەهێن شێوەكاری گەهاندنە وان و خەلكێ ئەلمانی ژی گەلەك هاریكاری گەهاندنە خەلكێ مە ل رۆژئاڤا، د هەمان دەمدا دناڤا وان پێشانگەهان دا، من بەحسێ كۆچبەرییێ ژی كرییە، هونەرمەندێن ئەلمانی ژی گەلەك ب كارێن من كەیفخۆش بوون.
ناڤهاتی گۆت : نوكە ژی ئەز كاری ل سەر چێكرنا چەندین كەڤالان دكەم، كو بابەتێن وان ل سەر هیڤیا ژیانێ و ئاشتییێ و كۆچبەرییێ نە، ئەز دخوازم ب رێیا كارێ خۆ ئێش و ئازارێن خەلكێ كوردستانێ نیشا خەلكێ جیهانێ بدەم، ژ پێخەمەت ئەو ژی ژ نێزیكڤە هایداری رەوشا خەلكێ كورد ببن و بزانن ب چ رەنگ ژیانا خۆ دەرباز دكەن، هەروەسا ئەو جلكێن كوردان دناڤا كەڤالێن خۆدا نیشا ددەت و ئەو كار دكەت، داكو هونەرێ خۆ ل هەموو جیهانێ بدەتە نیاسین و هەتا نوكە من چەندین پێشانگەهێن شێوەكاری یێن تایبەت ل وەلاتێ ئەلمانیا و چەندین وەلاتێن دیتر یێن ئورۆپی ڤەكرینە و من چەندین پێشانگەهێن شێوەكاری یێن هەڤپشك ژی ل گەل شێوەكارێن ئەلمانی ڤەكرینە.
