د ئەڤ سالەدا 24 بازرگانێن داربڕ هاتینە دەستەسەركرن
، هەرهین محەمەد:
بەرپرسێ رەوشەنبیری و راگەهاندنا هێزا دهۆك یا پاراستنا ژینگەهێ دیار كر، ئەڤ سالە سەرپێچیێن بەرامبەری ژینگەهی هاتینەكرن وەكو داربڕین پترن ژ سالا بۆری و ئەو كەسێن داران دبڕن بازرگانن و د ئەڤ سالە دا 24 بازرگانێن داربڕ هاتینە دەستەسەركرن و ئەو دارێن دبڕن دفرۆشنە خودانێن مەزرەعا و خوارنگەهان.
عەبدولستار عەبدولحەمید، بەرپرسێ رەوشەنبیری و راگەهاندنا هێزا دهۆك یا پاراستنا ژینگەهێ گۆت: رێژەیا داربڕینێ ل گەل سالا بووری، ئەڤ سالە پتر دار هاتینە برین، ژ بەر كو بازرگانێن داربڕ زێدەتر لێهاتینە و ئەگەر خەلكێ مە هەموو دەمان هاریكارە ل گەل ژینگەهێ و ئەو خۆ دپارێزن و خەلكێ گوندان ناهێلن دەڤەرێن وان بهێنە تێكدان و ناهێلن كەسێن بیانی بچنە دەڤەرێن وان.
زێدەتر گۆت: ئەو دارێن رۆژانە دهێنە بڕین و سەرپێچی ل سەر دارستانێ دهێنە كرن، ب تنێ بازرگان وی كاری دكەن و هەر جهەكێ بزانین سەرپێچی ل سەر دارستانێ هەیە و داران دبنیرا دبڕن، ئەم ئێكسەر مەفرەزێن خوە یێن گەروك رەوانەی وی جهی دكەین و وی كەسی دەستەسەردكەین و دوسە بۆ دهێتە ڤەكرن و دهێتە رەوانەكرن بۆ دادگەهێ.
خویاژی كر، د ئەڤ سالەدا 24 بازرگانێن داربڕ هاتینە دەستەسەركرن و ئەو دارێن دبرن رەوانەی مەزرەعا و خوارنگەهان دكەن، دبیت وان پێدڤییا پێ هەی و هەردیسان دهنێرنە دناڤ باژێرێ دهۆكێ ژی دا، بەری چەندەكێ ژی مە ترێلەك گرت كو پتری 22 پیكەمێن داران تێدا هەبوون و ب تنێ پیكەمەكا دارێ سپیندارێ دانا بوونە ب سەر ڤە و ژبنڤە ئەو داربوون یێ ژیێ وان ژ هەشتێ سالان دەرباز ببوو و ئەڤ ترێلە ژی هاتبوو ئامادەكرن ئەڤ دارە بهێنە ڤەگوهاستن و بهێنە رەوانەكرن ژ بۆ دەرڤەی دهۆكێ بۆ لایێ مادێ 140 بچن و ب خوشحالی ڤە بەری ئەڤ ترێلە ژ ناڤ سنورێ پارێزگەها دهۆكێ دەركەڤیت هاتە دەستەسەركرن.
بەرپرسێ رەوشەنبیری و راگەهاندنا هێزا دهۆك یا پاراستنا ژینگەهێ گۆت ژی: نوكە هندەك كارگەه هەنە یێن چێكرن و كەبسكرنا رەژیێ و داخازدكەم ئەڤ كارگەهە ژی سەرپێچێ نەكەن و ب دروستی كارێ خوە بكەت، كارێ وێ كارگەهێ ئەوە دار چەندێ بچووك بیت كەبس دكەت و دكەتە رەژی و بۆ رەژیا ڤێ كارگەهێ بهێزترە ژ رەژیا قورمێ دارێ و داخازیا مە ئەوە خودانێن خوارنگەهان ڤێ رەژیێ ب كاربینن نەكو رەژویا قورمێ دارێ بیت، چونكو هەر دەمەكێ وان بازرگانان دەلیڤە دیت دێ هەر سەرپێچیێ كەن.
ئەو یەك ژی دیار كر، وەكو هەرسال مە رێنما هەنە ژ رێڤەبەریا گشتی یا هێزا دهۆك یا پێشمەرگێ پاراستنا ژینگەهێ و رێڤەبەرییا پولیسێن دارستان و ژینگەهێ و رێڤەبەریا چاندنێ ئەو رێنمایە دگەهنە هەموویان هەرسال دڤێت ئەم هاریكاریا خەلكی ب كەین، بەلێ ب مەرجەكی خەلك ژی یێ هاریكاربیت ل گەل مەدا و هەر وەلاتیەكێ پێدڤی دارا بوو، چ بۆ خۆ گەرمكرنێ بیت، یان بۆ خارن چێكرنێ بیت، دێ عەریزەكێ دەت ل وی جهێ ئەو نێزیك، ئانكو ب رێكا ناحیا و قایمقامیان مە لژنە هەنە و دەمێ ئەو وەلاتیە عەریزا خوە ددەتە جهەكێ ژ ئەڤێن مە گۆتین، ئێكسەر ئەو جهە دێ كەتە لژنە و هەڤالێن مە ل گەل وی كەسی دێ چنە وی جهی یێ وی وەلاتی دڤێت بۆ خوە پیكەمەكا دارا بینیت بۆ پێدڤێن خۆ، بەلێ نابیت دار ب هیچ رەنگەكی دبنیڕا بهێتە بڕین، دڤێت ب شێوێ كەزاخێ بهێتە بڕین، ئانكو تایێن هشك و كەڤنار بهێنە بڕین و ئەو دارە خەمل و جوانیا خوە ژ دەست نەدەت، چونكو دبیت هەر ئەو وەلاتیە ل سالا ل دووڤدا پێدڤی وێ دارێ بیت.
