د. بێكەس بریفكانی: جهێ جەروانە یێ شوونواری دێ هێتە نووژەنكرن
رێڤەبەرێ شوونواری و كەلەپۆرێن پارێزگەها دهۆكێ دیار كر، جهێ شوونواری یێ جەروانە دێ هێتە نووژەنكرن و بیتە جهەكێ گەشتیاری.
د. بێكەس بریفكانی، رێڤەبەرێ شوونواری و كەلەپۆرێن پارێزگەها دهۆكێ، د دیدارەكێ دا بۆ رۆژناما ئەڤرۆ دیار كر، جهێ شوونواری یێ جەروانە ل پارێزگەها دهۆكێ، ئێكە ژ كەڤنترین و مەزنترین قەنتەر، ئانكو پرا دەربازبوونا ئاڤێ یە، ل سەر ئاستێ جیهانێ هاتیە دروستكرن، مەرەم ژ دروستكرنا وێ پرێ ئەوە، كو ئاڤێ ل سەر ڕا دەرباز بكەن، جهێ شوونواری یێ جەروانە ل هەمبەری مەهەتێ یە، كەنالێ ئاڤێ ل خنس دەستپێكرییە، هەتاكو ژ وێرێ ئاڤ برییە باژێرێ نەینەوا، كو درێژاهییا وی كەنالی 80 كیلۆمەترن، كو بەری 2800 سالان بوویە و ل سەردەمێ پاشا سەنحاریبی بوویە، كو ئەو ئەندازیارێ پڕۆژەیێن ئاڤدێرییێ بوویە و وی ئەڤ پڕۆژە چێكریە، كو وی ئاڤ ژ خنس ئینایە و ل جەروانە دەرباز كرییە و برییە نەینەوا.
ناڤهاتی گۆت: «د جهێ شوونواری یێ جەروانە دا، دو ملیۆن و 500 هزار بەر هاتینە ب كارئینان، ئەو بەرە ژی هەموو ژ چیایێن نێزیكی خنس ئیناینە وێرێ، كو ئەو بەر ل وی جهی نینن، ئەو پرە 300 مەتران یا درێژە و 22 مەتران یا فرەهە و نەه مەتران ژی یا بلندە، گەلەك تێكستێن مزماری ل سەر بەرێن وێ قەنتەرێ هەنە، هەروەسا ل بهارا سالا بهێت ئەو دێ كار ل سەر نووژەنكرنا جهێ شوونواری یێ جەروانە كەن، دیسا كێشا وی بەرێ بۆ وێ پرێ هاییە بكارئینان د ناڤبەرا (250 – 500) كیلۆیان دایە، گەلەك ژ وان بەرێن د وێ قەنتەرێ دا هاتینە بكارئینان نەماینە و خەلكی ژی هندەك برینە و هندەك ژی بن ئاخ بووینە، لەوما هندی ئەم بشێین دێ وان بەران ڤەگەڕینین و دێ وی جهی نووژەن كەین و دێ بیتە جهەكێ گەشتیاری ل پارێزگەها دهۆكێ«.
