د بەرسڤا پەیڤا زێرینا جەنابێ بارزانی دا چ ژ ئالیێ هەمبەر دهێتە خواستن؟
عومەر سندى
ب دیتنا من تشتێ هەرى نە د جهێ خوەدا، هەرى كێم و هەرى نەرەوا ئەوە مرۆڤ خوەشمرۆڤى و جامێریا ئالیێ هەمبەرى خوە ب هەل و فەرسەند بزانە ژبۆ بەرژەوەندیا خوە و بجهئینانا ئارمانجەكى نەرەوا كو ل هەمان دەمدا بكارئانینا ڤێ فەرسەندێ د بەرژەوەندیا دوژمنێ گەلێ كورد دابت دێ یەكسەر چمە ناڤ ناڤەرۆكا بابەتى ل رۆژا دوشەمبیا دەربازبووى رێزدار سەرۆك بارزانى مێهڤانێ فراكسیۆنا پارتى دیمۆكراتى كوردستانى ل پەرلەمانێ كوردستانێ ل گۆرەى كو پەرلەمەنتەر هیڤیدار ئەحمەد ژبۆ چەند دەزگەهەكێن میدیایێ خۆیاكرى كو سەرۆك بارزانى ل هەمبەر وان گۆت (من كوژى براكوژى یا حەرام كرى و نابت ب هیچ رەنگەكێ خۆینا كوردى ب دەستێ كوردى وەرە رشتن ب هەر ئەگەرەكا هەیى)، هەلبەت ئەڤ گۆتنا سەرۆك بارزانى نە نوویە، جەنابێ وى ئەڤ ئاخفتنە ل ناڤەندا سالێن نۆتان دا گۆتبوو ل دەمێ شەڕێ مالۆێرانیێ د ناڤبەرا پارتى و یەكەتی دا رووداى، ئەڤا نها جەنابێ وى فەرمووى تنێ نووكرنا وێ سۆزێ یە، یا دایى گەلێ كورد بەرى نێزیك بیست سالان سەرۆك بارزانى ژ هەر كەسەكێ پتر و باشتر دزانە كورد كوردى بكۆژت چ تاوانەكە… چ مالوێرانى و كارەساتەكە و چ دەردەكى گرانە، لەوماژى هەر ل دەستپێكا شەرێ براكوژیێ ناڤ لێكر شەڕێ خۆكوژیێ هەلبەت شەڕێن براكوژیێ یان شەڕێن ئەهلى ل گەلەك وەلاتان ب ئەگەر و بەهانێن جودا جودا رویداینە لێ ب مخابنیڤە باوەرناكم هیچ نەتەوەیەكێ قاسى كوردان ژهەڤ كوشتبن قاسى كوردان مێرخاس و مێرچاك و عەگید د ڤان شەڕان دا بەیهودە ژ دەست دابن دوژمنێن كوردان قاسى كوردان بخوە ژ كوردان نەكوشتینە، ب مخابنیڤە ئەڤە دیرۆكەك رەشە لێ ئەم نكارین سەردا بازبدین و دۆرهێل ئەڤیە گەرەكە ئەم دانپێدانێ پێ بكین نووكرنا ڤێ سۆزێ ژبۆ گەلێ كورد و د ڤێ رەوشا نازك و نالەبار و مەترسیدار دا ژ ئالیێ جەنابێ سەرۆك بارزانیڤە ل گۆرەى خواندنا من دەستكەفتەك و پێشڤەچوونەكى نەبچووكە بۆ ئیرۆ بۆچى؟ ئەم نابە هۆ ب هێسانى مێزەى بابەتى بكین فشار و گڤاشتنێن دژوار ل سەر سەركردایەتیا كوردى و حوكمەتا هەرێما كوردستانێ هەنە، ب تایبەت كەسایەتیا رێزدار مەسعود بارزانى كو وەكو كەسێ خوەدى بریارا هەرى یەكلاكەر ل باشۆرێ كوردستانێ ژ ئالیێ دەولەتێن داگیركەرێن كوردستانێ ڤە، ب تایبەت دەولەتا تورك كو دوژمنێ هەرى سەرسەختێ كوردانە ب مەرەما سینگێ كوردان بكەڤە هەڤ و لۆلیێن تڤەنگێن خوە ئاراستەیى سینگێ هەڤ بكن و ئەو روونن و مێزەى مە بكن، ل ڤێرە سەرۆك بارزانى ب پەیڤا خوە یا زێرین و نووكرنا وێ سۆزێ دبێژتە دوژمنێن كوردان خیالاوە خاڤە و ئەو مراد ب دلێ وەناكەڤە و ناهێلم كورد كوردى بكۆژە ئەڤە هەركیەكا سۆر و سۆرە ل گەل دوژمنى و ژناڤبرنا خەونێن وانە و گەرەكە ئەڤ هەڤڕكیە هەرە سەرى، ئانكو بەردەوامبە لێ چاوا ئەڤ هەركیە وێ بسەربكەڤە؟ جارێ مەزنێن مە پێشیا سەدان سالان گۆتینە دەستێ ب تنێ دەنگ ژێ نایێ، دا پتر بۆ خویندەڤانان رۆهن بكین دەما ئەم دبێژین براكوژیا ئیرۆ، مە مەرەم پێ ئالۆزیێن د نێڤبەرا پارتى دیمۆكراتى كوردستان (پارتى) و پارتیا كاركەرێن كوردستانێ (پ ك ك) یە، ئێ ما نەڤێت پەكەكەژى ل هەمبەر ڤێ سۆزێ و دەستپێشخەریێ و د ڤێ رەوشا گران و مەترسیداردا پێنگاڤەكا ئەرێنى باڤێت؟ مانە دڤیا ژبۆ پشتگیریكرن ل ڤێ سۆزێ د وارێ پراكتیكدە هندەك پێنگاڤ هاتبان ئاڤێتن كو بەهانە ژبۆ دەولەتا تورك و حوكمەتا ئاكەپێ نەمابا لەشكەركێشیا باشۆرى كوردستانێ بكە؟ ئەز دیسا ناڤەگەرم یا من ل گۆتارێن بەرى نهادا گۆتى كانێ رویبرویبوون و شەڕكرن ل گەل دەولەتا تورك ل سەر ئاخا باشورێ كوردستانێ قازانجێ وێ چەندە ڤێ جارێ دێ پرسم ئەرێ خوسارەتا مە وەكو كورد و یا وە وەكو پارتیا كاركەرێن كوردستانێ چەندە هەلبەت ئەو گرێلایێن گیانێ خوە ژ دەستددەن برایێن مەنە و ژ پشت پشتا مە دچن ب مخابنیڤە د بەرچیدا د بەر ئاخەك د كۆكا خوەدا رزگاركریە وە یاكریە مەیدانا شەڕێ خوە ب ئەگەرێ هەبوونا وە ل باشۆرێ كوردستانێ و ب بەهانا وە تركان چەند بارەگا دەینان؟ چەند گوند كاڤل كرن؟ چەند هەژارێن سڤیل بووینە قوربان؟ ئەڤە ژى چونە بلا بارەگایێن وە ل قەندیلى بن ئەمدێ بێژین باكۆر دەشتە و هیچ چیایەك لێ نینە باشە چما كریارێن لەشكرى و پارتیزانى ل هوندرێ دەولەتا تورك نائێن ئەنجامدان؟ ئەڤە دو رۆژ ب سەر گۆتنا سەرۆك بارزانیڤە دەربازبین كانێ پێشوازیا وە؟ مە گۆت دەنگ ژ هەردو دەستان تێ.!!.
