د جاما ئیراقێ دا دهۆك دێ شرگاتێ مێڤانكه‌ت
ئه‌ڤرۆ،
دوهی ب پشكداریا 48یانێن پلا ئێك و دو یێن خولا ئیراقێ و یانێن هه‌رێما كوردستانێ پشككێشانا قاره‌مانا جاما ئیراقێ ل باژێرێ به‌غدا هاته ئه‌نجامدان ئه‌وا هاتینه به‌لاڤكرن لسه‌ر چار كۆمان، بڕیاره ل ئه‌ینیا بهێت تیما یانا دهۆك ل یاریگه‌ها خوه مێڤانداریا یانا شرگات كه‌ت.
د داخویانیه‌كێدا ئازاد ئه‌حمه‌د سه‌رپه‌رشتێ تیما ته‌پا پێی یا یانا دهۆك بۆ رۆژناما ئه‌ڤرۆ دیاركر كو یاریا ئێكێ هه‌مبه‌ری شرگات تاقیكرنه‌كا بهێزه به‌ری ب كه‌ڤینه د هه‌ڤڕكیێن خولا پلا ئێكا ئیراقێ دا، سه‌رباری وێ قاره‌مانیا جاما ئیراقێ ب گرنگی دزانین و رژدین باشترین شێوی هه‌ڤڕكیێ بكه‌ین و هیڤی و ئۆمێدێن مه بۆ ناسناڤی نه، هه‌رچه‌نده ئه‌ركێ ب زه‌حمه‌تر و گرنگتره ئه‌وه سه‌رئێخستنا تیمێ یه بۆ پلا نایاب و ئه‌ڤه ئارمانجا سه‌ره‌كی یه.
ناڤهاتی ئه‌وچه‌نده ژی دیاركر كو تیما دهۆكێ به‌رهه‌ڤیێن باش كرینه و رژده ژبۆ سه‌ركه‌فتنێ بهێنه دناڤ یاریگه‌هێ دا، شرگات ژ تیمێن پێشكه‌فتی یه و خودان یاریزانێن باشن و یاری ب سانه‌هی نابیت، ب هیڤی نه مفایی ژ ئه‌ردێ خوه وه‌ربگرین و سه‌ركه‌فتنا ئێكێ ده‌ست ب چالاكیان بكه‌ین.