د خولا کوردستانێ دا، دهۆكێ دەستپێكەكا خراب تۆمار كر و زاخۆ و ئاكرێ وەكهەڤبوون
قەیس وەیس:
ل پێنج شەمبی و ئەینییا بۆری وەرزێ نوو 2023-2024 یێ خولا پلا نایابا كوردستانێ یا تەپا پێی ب ئەنجامدانا هەشت یارییان ل یاریگەهێن جودا هاتنە كرن، دهۆكێ دەستپێكەكا خراب د یارییا خوە یا ئێكێ دا تۆماركر و هەردو یانەیێن زاخۆ و ئاكرێ وەكهەڤییا گۆلەكێ و خالەكێ پەردە ل سەر خولێ راكر.
ل پێنج شەمبییا بۆری تیما یانەیا زاخۆ خوە ژ خوسارەتیا ئێكێ قورتالكر پشتی دگەل مێڤانا خوە یانەیا ئاكرێ ب گۆلەكێ وەكهەڤ بووین د یارییا وان دا ئەوا ل یاریگەها دەلال ئێك ژ دێربیێن پارێزگەها دهۆكێ هاتییە كرن، گۆلا ئاكرێ د خولەكا 51ێ ژلایێ یاریزانێ وێ سەلاح حەسەن تۆماركرن، گۆلا زاخۆ ژلایێ یاریزانێ وی یونس عەبد د خولەكا 78ێ تۆماركر، ژ یاریێن دی یێن هەمان رۆژ، رانیە2- چنە دەربەندیخان، هندرین چنە- چنە پێشمەرگەیا هەولێر، شەقلاوە چنە- 1 برایەتی.
ژلایێ خوەڤە تیما یانەیا دهۆك دەست ب ئەنجامەكێ خراب د خولێ دا كر پشتی ب پێنج گۆلێن پاقژ دگەل یانەیا سەید سادق تووشی خوسارەتیێ بوو، دیارییا واندا ئەوا ل ئەنییا بۆری ل پارێزگەها سلێمانیێ هاتیە كرن، ئەڤ ئەنجامە مەزنترین خوسارەتییا دهۆكێ یە د گەڕا ئێكێ دا، ژ یاریێن دی یێن ئەینێی هاتینە كرن، هەولێر 1-1 چارقۆرنە، شێروانە 2-چنە سۆران، ئارارات 1-1 سیروانی نوو.
بۆ زانین تیما یانەیا دهۆك بەری دەستپێكرنا خولێ كێمتر ژ هەیڤەكێ دەست بەرهەڤییان كربوو، پشتی كارگێرییا یانەیا دهۆك ل خزیرانا بۆری بایكۆتا چالاكیێن خولا كوردستانێ كربوو دەرئەنجامێ نەرازیبوونێ ل سەر بڕیارێن فیدراسیۆنا تەپا پێی یا كوردستانێ و روودانێن یارییا دهۆك و پێشمەرگەیا هەولێرێ ژ كۆپا كوردستانێ.
