د. دیلمان خۆشناو: پتریا تاوانێن ده‌ستدرێژیا سێكسی ناچنه دادگه‌هێ
هه‌ولێر، قائید میرۆ:
پشتی ل راگه‌هاندنێ هاتیه به‌لاڤكرن كو نۆشداره‌كێ جوانكاریێ ده‌ستدرێژی كریه سه‌ر كچه‌كێ كارڤه‌دان دووڤدا هاتینه و نۆشداره‌كا بسپۆر ژی ل نۆشداریا داد دبێژیت: ده‌ستدرێژیا سێكسی دناڤا هه‌موو ته‌خ و چینێن جڤاكی هه‌یه و نابیت تنێ به‌حسێ نۆشداران بهێته كرن، هه‌روه‌سا زۆربه‌یا ئه‌و ده‌ستدرێژیێن دهێنه كرن بۆ سه‌ر كچ و ژنان ناچنه دادگه‌هێ و ب نهێنی دمینن.
دكتۆر دیلمان خۆشناو، بسپۆرا نۆشداریا داد بۆ ئه‌ڤرۆ دیار كر، ده‌ستدرێژیا سێكسی ل هه‌موو جهه‌كی هه‌یه و نابیت تنێ بهێته گرێدان ب جهه‌كی ڤه یان ته‌خه‌كا جڤاكی ڤه، هه‌روه‌كی به‌ری چه‌ند رۆژان به‌حسێ ده‌ستدرێژیا سێكسی هاتیه كرن ژلایێ نۆشداره‌كێ جوانكاریێ، ئاخفتنێن دناڤا خه‌لكی و سوشیال میدیایێ هاتینه به‌لاڤكرن هه‌ر هه‌موو راست نینن.
د. دلمانێ گۆتژی: (ئه‌ز وه‌ك شاره‌زایه‌ك د ئه‌ڤی بیاڤی دا زێده‌تر باده‌كێن كچێن سنێله من دیتینه، چونكی ده‌ستدرێژیا سه‌ر كچێن سنێله دهێته كرن، هه‌تا هه‌كه ب رازیبوونا كچێ ژی بیت ئه‌ڤه هه‌ر ب تاوان دهێته هژمارتن ژلایێ قانوونێ ڤه، زۆربه‌یا باده‌كێن ده‌ستدرێژیا سێكسی بۆ سه‌ر كچ و ژنان ناچنه دادگه‌هێ و سكالا ناهێته تۆمار كرن، ئه‌ڤه‌ژی زێده‌تر ژبه‌ر كلتوور و داب و نه‌ریتێن جڤاكیه، له‌وڕا ژی تاوانێن سێكسی و ده‌ستدرێژیا سێكسی زۆربه‌یا وان ب نهێنی دمینن و ناهێنه به‌حسكرن یان ژی هه‌كه بچنه دادگه‌هێ ژی هه‌ر نهێنیه و خه‌لك نه‌شێت زۆر به‌حس بكه‌ت وه‌كی تاوانه‌كا دی.
دكتورایێ ئاماژه پێ كر، هه‌ر كه‌سه‌كێ به‌حسێ ده‌ستدرێژیا سێكسی بكه‌ت، پێدڤیه به‌لگه‌یێن دروست لبه‌رده‌ست هه‌بن و نابیت هه‌ر ناڤێ خه‌لكی بهێته برن و به‌لگه‌یێن پێدڤی لبه‌ر ده‌ست نه‌بن، ئه‌ڤه كاره‌ساته هه‌تا نابیت لسه‌ر راگه‌هاندنێ به‌حسێ وان حاله‌تان بهێته كرن، هه‌روه‌سا نابیت بابه‌تێن سێكسی بهێنه مه‌زن كرن، چونكی ژبلی به‌لگه‌یێن پێدڤی لسه‌ر هه‌ر تاوانه‌كا سێكسی دڤێت به‌لگه‌یێن زانستی ژی هه‌بن.
د. دیلمانێ د به‌رده‌وامیا ئاخفتنێن خوه‌دا گۆت: (ئه‌ز ل گه‌ل ڤێ چه‌ندێ مه خه‌لك بهێته هشیار كرن ب رێیا میدیایێ، كا چاوا ده‌ستدرێژی دهێنه كرن و چاوا ئافره‌ت بشێت خوه بپارێزیت، به‌لێ نابیت تنێ ناڤێ نۆشداره‌كی بهێته ئاشكرا كرن و دناڤا هه‌موو چین و ته‌خێن جڤاكی ده‌ستدرێژیا سێكسی دهێته ئه‌نجامدان، بتنێ دناڤا ته‌خا نۆشداران نینه، ئه‌ف حاله‌تێ هاتیه به‌لاڤكرن ل راگه‌هاندنێ ل سه‌ر نۆشداره‌كی نه‌شێم بێژم راسته و نه‌شێم بێژم راست نینه، به‌لێ بۆچی تنێ ل راگه‌هاندنێ هه‌یه و ناچنه دادگه‌هێ بۆ ئێكلا كرنێ.
