د دێربییا دهۆك و زاخۆ ل هەولێرا پایتەخت د سەقایەكێ جودا دایە
قەیس وەیس:
چاڤەڕێ دهێتە كرن ئەڤرۆ دەست ب هەڤڕكیێن گەڕا 25ێ ژ خولا ستێرێن ئیراقێ یا فوتبۆلێ ب ئەنجامدانا پێنچ یارییان، دیدارا دێربییا دهۆك و زاخۆ ژ گرنگترین هەڤڕكیێن ڤێ گەڕێ نە، سوبەهی پێنچ یاریێن مایی دێ هەڤڕكیێ ڤێ گەڕێ ب دووماهی ئینن ژ وانا یاریێن هەولێر و نەورۆزن.
دێربییا ئەڤجارە جودایە
بڕیارە ئەڤرۆ ل دەمژمێر 5:30 ئێڤارییا درەنگ یاریگەها شەهید فرانسۆ حەریری ل هەولێرا پایتەخت مێڤاندارییا دێربییا پارێزگەهێ دناڤبەرا یانەیا دهۆك و زاخۆ بكەت كو دهێتە هژمارتن دێربییەكێ جودا و تایبەت، ژ بەر كاودانێن نوكە یێن دەڤەرێ كو ژ یاریگەها دهۆكێ ڤەگوهاستیە هەولێرێ بێ جەماوەر.
د ڤەڕێژا ئەنجامێن ئەلهۆیێن چیا هەتا نوكە نەهـ سەركەڤتن هەنە دگەل حەفت وەكهەڤی و د بەرانبەر دا هەشت خوسارەتی داینە، یاریزانێن وێ 27 گۆل تۆماركرینە لێ 24 گۆل ل سەر هاتینە تۆماركرن، دەرئەنجامێ وانا دنوكە دا تیما دهۆكێ ب 34 خالان ل ڕێزا نەهێ دهێت.
ژلایێ خوەڤە تیما كوڕێن خابووری ل ڕِێزا حەفتێ دهێن ب كۆمكرنا 40 خالان ژ ئەنجامێ 11 سەركەڤتنان، حەفت وەكهەڤی و خالێن شەش یارییان ژ دەستداینە ب خوسارەتی، یاریزانێن وێ31 گۆل تۆماركرنیە و 21 گۆل ل سەر هاتینە تۆماركرن.
هەردو یانە چاڤ ل ئاشتكرنا جەماوەری نە
هەردو یانەیێن پارێزگەهێ نەشیاینە د گەڕا بۆری دا سەركەڤتنان بینن، دهۆك بەرانبەر مینا ب گۆلەكێ وەكهەڤ بوو، زاخۆ بەرانبەر شورتە ب دو گۆلان تووشی خوسارەتیێ بوو، ئەڤ ئەنجامە ببوونە جهێ نەڕازیبوونا پشتەڤانێن هەردو یانەیان و توورە بوون، لەوما ژی دهێتە پێشبینیكرن ئەڤ یارییە بۆ هەڤڕكییا سێ خالان بیت نەوەكو پێشتر دهاتە گۆتن بتنێ وەكهەڤی دێ زال بیت، ئەڤجەندە ژی ژبۆ ئاشتكرنا پشتەڤانێن خوە دێ كەن.
هەولێر هەڤڕكا پێشەنگێ یە
تیما یانەیا هەولێر بەردەوامە ل سەر هەڤڕكیێ بۆ ڕێزێن پێشیێ سەرباری وەكهەڤییا وێ د گەڕا 24ێ دا بەرانبەر یانەیا نەفت میسان بێ گۆل، كوڕێن كەلهە و منارە لەشكەرێ باسم قاسمی ل ڕێزا سێیێ دهێن ب كۆمكرنا 50 خالان ژ 15 سەركەڤتن، پێنج وەكهەڤی و چار خوسارەتییان، یاریزانێن وێ 34 گۆل كرینە و 20 گۆل ل سەر هاتینە تۆماركرن.
یاریزان دخوازن یارییەكا براینی بیت
د دیدارەكێ دا عەلی كازم گۆلپارێزێ یانەیا زاخۆ خواست یارییا ئەڤرۆ پتر فۆكس ل سەر ئەنجامدانا یارییەكا جوان و برایەتیێ بیت و سرۆشتیە هەردو تیم دێ بۆ سێ خالان كەن لێ یارییەكا جوان بیت و بێ هیچ ئاریشە دەرباز بیت.
ژلایێ خوەڤە هارۆن ئەحمەد كاپتنێ یانەیا دهۆكێ هیڤی خواست یارییا ئەڤرۆ نموونەیا برایەتیێ بیت و خۆدیكا جوانیێ و رەوشت بەرزیێ بیت و گۆت: یاریگەهێن مە ب هەبوونا پشتەڤانێن هەردو یانەیان د جوانن، لێ ژبەر كاودانێن نوكە نەچارین بێ پشتەڤان بكەین، یا گرنگ یارییەكا جوان بهێتە كرن و یاریزانێن هەردو یانەیان ئاستەكێ نموونە نیشان بدەت، پێنەڤێت سێ خالێن یاریێ بۆ هەر تیمەكێ دگرنگن و هەردو یانەیان سەركەڤتن دڤێت و ئەڤە ئۆمێدەك و مافێ هەر تیمەكێ یە، بۆ مە گرنگ جوانترین شێوە و برایەتی یاری بهێتە كرن.
هەولێر دگەل هێزەكا بەغدایە
ژلایێ خوەڤە بڕیارە سوبەهی ل دەمژمێر سێ ئێڤاری یاریگەها شەهید فرانسۆ حەریری یارییەكا ب هێز و ئاگرین مێڤانبكەت دەمێ یانەیا هەولێر دناڤ ئەرد و جەماوەرێ خوە دا یانەیا زەورا یا بەغدایی مێڤانبكەت كو دهێتە هژمارتن ئێك ژ یاریێن دی یێن ب هێز د ڤێ گەڕێ دا، كوڕێن كەلهە و منارە ل ڕێزبەندیەكا باش دهێن ئەوێن ل ڕێزا سێیێ ب كۆمكرنا 50 خالان دهێن ژ 15 سەركەڤتن، پێنج وەكهەڤی و چار خوسارەتییان، ژلایێ خوەڤە یانەیا زەورا 45 خال كۆمكرینە ل ڕێزا پێنجێ دهێت ئانكو هەڤڕكا ڕێزبەندییا هەولێرێ یە
نەورۆزێ دڤێت نێجیرەكا دی بگریت
پشتی د یارییا بۆری دا سەركەڤتی ل سەر یانەیا ئەلغراف، چاڤەڕێ دهێتە كرن سوبەهی یانەیا نەورۆز یا باژێرێ سلێمانیێ ل یاریگەها خوە دەمژمێر سێ ئێڤاری یانەیا نەفت میسان مێڤان بكەت و چاڤێ وێ ل نێجیرەكا دی یە و كەیفخوەشكرنا جەماوەرێ خوەیە، تیما یانەیا نەورۆز خودانا 34 خالانە كێمترییا گۆلان ل ڕێزا نەهێ دهێت ژ دەرئەنجامێ 11 سەركەڤتنان، ئێك وەكهەڤی و 12 خوسارەتی هەبووینە، ژلایێ خوەڤە یانەیا نەفت میسان ل ڕێزا 16ێ دهێت ب كۆمكرنا 22 خالان و دێ بزاڤێ كەت خوە ژ زوونا داكەڤتنێ پارێزیت.
ژ یاریێن دی یێن مایی د ڤێ حەفتیێ دا
یاریێن ئەڤرۆ رۆژا دوشەمبی
مووسل- كارەبا، یاریگەها یانەیا دهۆك دەمژمێر 5:30ێ ئێڤاری.
تەلەبە- نەفت، یاریگەها ئەلمەدینە، دەمژمێر سێ ئێڤاری.
كەرخ- مینا، یاریگەها شەرار حەیدەر، دەمژمێر 5:30 ئێڤاری.
ئەمانەت بەغدا- ئەلگەرمە، یاریگەها شەرار حەیدەر, ل دەمژمێر 9:30 شەڤ.
یاریێن سوبەهی رۆژا سێشەمبی
شورتە- جەوییە، یاریگەها ئەلشەعب، ل دەمژمێر سێ ئێڤاری.
ئەلقاسم- دیالا، یاریگەها نەجەف، ل دەمژمێر 5:30 ئێڤاری.
ئەلغراف- نەجەف، یاریگەها ناسرییە، ل دەمژمێر 7:30 شەڤ. هەلوەستێ گشتی پشتی ب دووماهی هاتنا یاریێن گەڕا 24ێ ژ خولێ.
1- جەوییە 58 خال.
2- شورتە 52 خال.
3- هەولێر 50 خال.
4- تەلەبە 47 خال.
5- زەورا 45 خال
6- ئەلگەرمە 43 خال.
7- زاخۆ 40 خال.
8- كەرخ 38 خال.
9- نەورۆز 34 خال.
10- دهۆك 34 خال.
11- نەفت 32 خال.
12- مووسل 30 خال.
13- ئەلغراف 29 خال.
14- دیالا 29 خال.
15- مینا 26 خال.
16- نەفت میسان 22 خال.
17- كارەبا 21 خال.
18- ئەمانەت بەغدا 21 خال.
19- نەجەف 12 خال.
20- ئەلقاسم ئێك خال.
لیستەیا دەهێن دەستپێكێ یێن گۆلكەرێن خولێ
1- شیرزۆد نیمرۆڤ 20 گۆل، ژ یانەیا هەولێر
2- فیدیلێس كۆكۆ 14 گۆل، ژ یانەیا ئەلغراف.
3- لیۆنێل ئیتبا 13 گۆل، ژ یانەیا شورتە.
4- عەلا ئەلدین ئەلدالی 12 گۆل، ژ یانەیا مووسل.
5- یونس حەمۆد 11 گۆل، ژ یانەیا ئەلكەرخ.
6- پیتەر گۆرگیس، 11 گۆل، ژ یانەیا دهۆك.
7- محەمەد جەواد نەهـ گۆل، ژ یانەیا جەوییە.
8- حەسەن عەبدولكەریم، هەشت گۆل ژ یانەیا زەورا.
9- مەحمود ئەلمواس، هەشت گۆل، ژ یانەیا شورتە.
10- دیبۆتی ئێجیتا، حەفت گۆل ژ یانەیا زاخۆ.
هەڤڕكیێن خولێ دێ بەردەوامبن
د دیدارەكا رۆژنامەڤانی دا عەدنان درجال سەرۆكێ فدراسیۆنا فوتبۆلا ئیراقێ دیاركر هەڤڕكیێن خولا ستێرێن ئیراقێ دێ بەردەوامبن بێ ڕاوەستیاند، سەرباری هەلبژارتیێ ئیراقێ د نوكە دا ل وەلاتێ مەكسیكە ژبۆ ئەنجامدانا یارییا ڤەبر یا دەربازبوون بۆ مۆندیالا جیهانی بەرانبەر هەلبژارتیێ بۆلیڤیا ل سپێدەهییا چارشەمبییا بهێت و گۆت: ژبەر كورتییا دەمێ بۆ مۆندیالێ كو فیفایی هەموو وەلات نەچاركرینە بەری مۆندیالا 2026ێ دڤێت هەموو خولێن فوتبۆلێ ل جیهانێ ب دووماهی بهێن.
